السيسي يزف بشرى للعمالة غير المنتظمة.. ويصدر تكليف عاجل للحكومة بشأن الاشتراطات الجديدة للبناء

كلف الرئيس عبد الفتاح السيسي، الحكومة باستمرار تقديم المنحة للعمالة غير المنتظمة حتى نهاية العام الجارى.
جاء ذلك خلال افتتاح أكبر معمل تكرير في مصر وأفريقيا، بمنطقة مسطرد فى محافظة القليوبية.
وقال الرئيس السيسي: “طالما اتكلمت عن العمالة غير المنتظمة مش إدينا 3 شهور، طيب انتوا هتكملوا لأخر السنة ولا إيه.. الناس ظروفها صعبة.. فلو كان كده نكمل لغاية أخر السنة”.
كما كلف الرئيس عبدالفتاح السيسي، الحكومة بسرعة الانتهاء من الاشتراطات الجديدة للبناء، وإعلانها للشعب.
وقال الرئيس: “اشتراطات البناء والدنيا واقفة ودى مش من المصلحة.. خلصوا اشتراطات البناء وأعلنوها للناس والمسار الجديد إزاى هنظم عملية البناء في مصر علشان الدنيا تتحرك”.
وأضاف الرئيس: “عاوز أقول للناس الاشتراطات.. إن كان عندنا عيب في النظام خلى الدنيا كده وأنا بقول كلام مهذب.. كتير من بلدنا بالطريقة دى، لأن النظام اللى كان موجود قبل كده فى تنظيم البناء محتاج يتطور”.
وأكمل الرئيس السيسي: “الثمن اللى بيتدفع ده بيتحمله الشعب المصري كله، يهمنى أقول حاجة واحدة بس، براهن على الناس والمصريين طيب أنا بشكر المصريين “.
أكد الرئيس عبد الفتاح السيسي، إن هناك من يستغل المواقف الصعبة من أجل تشكيك المصريين فى ما يتم تنفيذه على أنه على حسابهم وضدهم.
وأضاف الرئيس السيسي: “رهانى على الشعب أنه متفهم ومقدر ويتحمل ما يتم تنفيذه.. واللى بيتعمل بيتعمل بالمصريين.. هى الدولة حاجة وشعبها حاجة تانية؟.. الدولة والشعب حاجة واحدة.. احنا بنجرى وأنا رهاني على الناس.. والحمد لله رب العالمين.. خلال السنوات الماضية كان الرهان كسبان”.
وأضاف الرئيس السيسى: “بنصلح فى الأرض.. لو بفسد فى الأرض هبقى خايف لأن مش هيبقى معايا ربنا.. ونحن نعمل فى مسار إصلاح وتنمية وتعمير لأن الدولة تحتاج إلى هذا.. الإصلاح الاقتصادى لم يكن سهلا.. وبفضل الله عدينا منه وحققنا انجازات الدنيا كلها بتتكلم عليها.. وأنا بقول بفضل الله وقدرنا نواجه الاقتصاد المتعثر والسياحة وغيرها”.