كل حاجة بقت أحسن.. مي فخري تكشف سبب ارتداءها الحجاب

وجهت الفنانة المعتزلة مي فخري رسالة إلى جمهورها ومتابعيها حول السبب الحقيقي وراء ارتدائها الحجاب، وذلك عبر حسابها بموقع «انستجرام»، مشيرة إلى أن قرارها جاء «للحفاظ على نعم ربنا عليها»، معربة عن سعادتها وارتياحها لـ«ارتداء الملابس الواسعة والمريحة، وتغير نظرات الناس لها»، على حد قولها.
وقالت: «عندي إجابة عن سؤال لكثير من الأشخاص وتحديدا البنات، عن ارتدائي الحجاب، وبعيدا عن الناحية الدينية تماما ومش هندخل فيها وأنا هتكلم بشكل منطقى الحمد لله ربنا أتم خلقى كاملة ومعنديش مشكلة وادانى نعم كتير مش عارفة أقول إيه ولا إيه وهو أدانى أنا النعم مش عشان الناس تتبسط بيها وهى نعم حبيت أحافظ عليها ودلوقتى انا في حال أفضل بكثير وأشعر بالراحة».
أضافت: «أنا حاليا إحساسي أحسن، ومش متقيدة خالص ولا الحجاب بيخلي شكلي مش حلو أو أن شكلى مش حلو في ملابسي، بالعكس مبسوطة أكتر من الأول بكتير، وبلبس كل اللي أنا عاوزاه بشكل محتشم ويليق مع الحجاب، وكل حاجة بقت أحسن».
تابعت: «نفسيًا بقيت أحسن بخرج في الشارع، ومفيش حد بيبص عليا النظرة اللي كل البنات عارفاها ويبقى نفسها الأرض تتشق وتبلعها، الحمد لله مبقاش بيحصل ومش بأخذ ذنب ناس مش قادرة تبص في الأرض أو مش قادرة تغض بصرها، مبقاش بتبص عليا ومبقتش أتضايق لما أخرج كل حاجة أفضل من الاول، ربنا اداني نعم وأنا بحافظ عليها».
واختتمت: «انا بتكلم بشكل منطقي جدا، وده الرد بتاع أنا اتحجبت ليه، مش عشان حلال أو حرام، انا بتكلم بشكل منطقي وصريح، ربنا انعم عليا بحاجات كتير ولازم نحافظ عليها، عشان لم أقف بين ايد ربنا، أقدر أقول أني حافظت على كل النعم».
يذكر أن الفنانة مي الفخري أعلنت ارتدائها الحجاب، سيبتمبر الماضي، كما قامت بحذف جميع صورها الجريئة عبر حساباتها بمواقع التواصل الاجتماعي، كما أعلنت منذ عدة أشهر رغبتها في ارتداء الحجاب، ورفضها العديد من العروض للعودة للوسط الفني.