في أول حوار إذاعي بعد نجاح مسلسل "ما وراء الطبيعة".. أحمد أمين لـ "إينرجي": أستعد لتقديم برنامج مخصص للأطفال | صور

حل النجم أحمد أمين ضيفا على برنامج "أضا أخف من أضا" والذي يقدمه محمد طارق أضا عبر إذاعة إينرجي 92.1، وكشف أمين أن بعد نجاح دوره في مسلسل "ما وراء الطبيعة" يستعد حاليا لتقديم برنامج للأطفال.
وفيما يلى عدد من تصريحات أحمد أمين في البرنامج الذي يذاع كل حد واثنين واربع بعد منتصف الليل:
- عندما عرض علي المخرج عمرو سلامة دور رفعت اسماعيل لم أرى نفسي في الدور وعرضت أن أرشح له ممثلين اخرين.
- مشهد الجثث في بركة الدم كان أكتر مشهد مرهق نفسيًا ليا في "ما وراء الطبيعة" خصوصًا إننا كنا بنعيد المشهد كتير.. والمشاهد اللي تحت المية كانت مرهقة بدنيًا جدًا.
- المخرج عمرو سلامة كان مقتنع جدًا إني أعمل شخصية "رفعت إسماعيل" في "ما وراء الطبيعة".. وحضّرت فترة كبيرة للدور وعملت بروفات كتير قبل التصوير.
- عمرو سلامة كان عنده تخوف إن شخصية "رفعت إسماعيل" تكون مكروهة ودي كارثة في أي عمل درامي إن البطل ميكونش محبوب فكان قدامنا تحدي كبير.
- نبيل فاروق ورواياته كانت السبب في اني أحب وأمارس هواية الكتابة.
- عمرو سلامة مخرج ذكي ومنظم ودايمًا عنده تطلع للأفضل.
- فكرة إني أعمل شخصية "رفعت إسماعيل" ده شرف كبير ليا لأنها من الشخصيات القليلة المحفورة في أذهان الناس في الوطن العربي.
- "أسطورة رفعت" هي روايتي المفضلة من روايات "ما وراء الطبيعة" وأتمنى تقديمها في اي موسم اخر للمسلسل.
- لسة مش عارفين في موسم قادم من "ما وراء الطبيعة" ولا لأ.. دي حاجة في إيد جهات الإنتاج.
- قوانين "رفعت إسماعيل" متشائمة جدًا وأنا متفائل جدًا طول الوقت.
- الأكل نقطة ضعفي ومزاجي.. أكتر أكلة بحبها الكوسة بالزبادي مش بقدر أقاومها.
- أكتر حاجة بخاف منها إن يكون في ارتباك من النجاح أو الفشل ونفسي أبطل كسل.
- أغرب شغل اشتغلته في حياتي إني أبقى رسام بالساعة وفي فترة كنت عازف كمانجا في فرقة.. لكن مشتغلش أي حاجة بعيدة عن الفن.
- بمثل في المسرح من صغري ووالدي وأخواتي كانوا بيشجعوني لأنهم بيحبوا الفنون جدًا.
- مش بقدر أقاوم إني اشتري أي آلات موسيقية عشان كده عندي منها كتير.
- بستعد لبرنامج هيتعمل مخصوص للأطفال.