سبب إعاقة في إيديها.. سر حادث أفسد حياة صاحبة فيديو الفلوس دي حلال؟
لم تتخيل رضا محمد، سيدة فيديو «الفلوس دي حلال؟» يوما ما، أن تتصدر المشهد على مواقع التواصل الاجتماعي المختلفة بين ليلة وضحاها، بعدما ظهرت بردة فعل غير متوقعة، خلال ظهورها مع الإعلامي أحمد رأفت، المعروف باسم «مذيع الشارع» في أثناء تصوير برنامجه «جبر الخواطر»، ليحولها البعض إلى قدوة يجب الاحتذاء بها.
وانتابت حالة من القلق السيدة «رضا» عند استلامها لجائزة المسابقة، لأنها لا تعرف مصدرها، بالإضافة لعدم تعبها أو عملها من أجل الحصول عليها، رغم المعاناة التي تعيشها طوال حياتها لكسب قوت يومها، وازدادت بتعرضها لحادث سير منذ عدة أشهر، تسبب في إعاقة بيدها.
تفاصيل حادث تعرضت له سيدة فيديو «الفلوس دي حلال؟»: عملت إعاقة في إيدي بنبرة صوت خافت يملأها معاناة الألم الذي طال سنوات من حياتها، روت «رضا» التي تعمل في خبز العيش بأحد المطاعم، خلال حديثها: «حصلتلي حادثة وأنا رايحة الشغل وراكبة في العربية، بعد ما عربية تاني دخلت فينا في شهر 9 اللي فات».
«الناس خدوني ودوني المستشفى، وعملولي عملية أخدوا شريان من رجلي علشان يحطوه في دراعي»، بحسب «رضا»: «عندي صباعين الصغير واللي جنبه في إيدي الشمال مبقدرش أحس بيهم خالص».
آلام السيدة صاحبة الـ55 عامًا، ازدادت بالحادث، خاصة في ظل معاناتها من القدم: «أنا كنت واخده حقنه غلط زمان، فكانت عاملة مشكلة في رجلي مع الشريان اللي اتحط في إيدي، خلاني مبقدرش أتني رجلي خالص».
رغبة «رضا» في استكمال علاجها، سرعان ما توقفت بسبب تكلفتها المرتفعة: «ناس كتير كانت بتقولي أنها محتاجة كشف وعملية، بس لما روحت ولقيتها مكلفة مروحتش تاني، لكن هي مأثرة طبعا عليا في الشغل».
وعلى الرغم من كل تلك المتاعب، إلا أن «رضا» تمكنت من تربيت أولادها الخمسة: «جوزت اتنين من بناتي، وابني الكبير، وكمان عندي واحد من ولادي بيعاني من التوحد».
