بشويش يا كابتن.. رسالة نارية من عمرو أديب لـ موسيماني بعد خماسية الأهلي في الزمالك | فيديو

شنَّ الإعلامي عمرو أديب، هجومًا على الجنوب إفريقي بيتسو موسيماني المدير الفني للنادي الأهلي، بعد تصريحاته عقب الفوز على نادي الزمالك.

وقال خلال برنامجه "الحكاية" على شاشة "mbc مصر"، مساء الجمعة: "موسيماني بشويش يا كابتن.. الدنيا يوم لك ويوم عليك.. الزمالك مش فريق صغير وإنت عارف السنة اللي فاتت كان عليك أد إيه".

وأضاف: "الأهلي كان أفضل وأكثر تنظيمًا ولعب إيجابيًّا ولديه دكة بدلاء مرعبة.. الماتش كان تقيل علينا أوي.. الأهلي كان أحسن وحظه كان أحسن.. الزمالك في الشوط الثاني كان منافس قوي".

وتابع: "قضاء أقل من قضاء.. ربنا سلم.. اللي حصل رضا والحمد لله".

علق الإعلامي عمرو أديب، على خسارة الزمالك بخماسية مقابل 3 أهداف أمام النادي الأهلي، قائلًا: "أول مرة في ماتش يجيلي صداع وأحس إن ضغطي عالي، وكل اللي في دماغي فرقة بتتغلب وبعد الجون الأول عادي والثاني والثالث والرابع والخامس، أول مرة أبقى عايز الماتش يخلص بعد تلت ساعة، وحاسس إننا داخلين على مصيبة كروية أو فضيحة كروية".

وتابع خلال برنامج “الحكاية” المذاع على قناة “إم بي سي مصر”: "اللي حصل في الدقايق الأولى أن نادي الزمالك جاله خضة وانهيار وحسيت إن كل حاجة بتقع وكل حاجة بتعدي قدامي وافتكرت أيام زمان، ولكن حاولت بقدر الإمكان أبلع اللي بيحصل بس ما تبلعش، ومدحت شلبي كان كل شوية يقول لنا ماتش كورة عادي ولكن الحق مكنش ماتش كورة عادي، بس بصراحة النهاردة الأهلي استطاع أن ينتقم للعام الماضي كله والدوري اللي راح والماتشات اللي ضاعت والأهلي قد انتقم تمامًا، وجت لحظة اننا هنبقى قدام سكور بايخ مش بس 6/1 ولكن نص العمى ولا العمى كله".

وأكمل عمرو أديب: "كمان فيه حظ أهلاوي غير طبيعي والجون الأول يحسسك إن فيه حاجة غير طبيعية إن الكورة تخش جون، وضربة الجزاء الثانية مش بنالتي لأن لاعب الزمالك ما كانش عايز يخبطه، والهدف الأول حظ، ولكن الأهلي استحق الفوز".

وأعرب الإعلامي عمرو أديب، عن إعجابه الشديد بالهدف الذي أحرزه محمد شريف لاعب النادي الأهلي من تمريرة عمرو السولية،في شباك نادي الزمالك، في المباراة التي انتهت بنتيجة 2/5 لصالح الأحمر.

وتابع عمرو أديب خلال برنامج “الحكاية” المذاع على قناة “إم بي سي مصر”:"نقلة عمرو السولية بـ 10 مليون جنيه اللي لعبها لشريف الحريف اللي بياكل بلوبيف جون عالمي ومقدرش أقول حاجة تاني، والأهلي نجح إنه يلعب شوط سوبر، والشوط الثاني لأ، وأرجو إن الناس اللي بعتالي على الخماسية أقول لهم هي ثنائية مش خماسية لأنه النتيجة 5/3، وأنا رأيي إن الماتش ده كمل 5 دقائق كمان كان الزمالك ممكن يتعادل، ولكن احنا قدام مدرستين، الأولى تعتمد على اللعب السريع اللي قدام من غير تعقيد، ومدرسة تانية قايمة على البلالين ونحضر من وراء، الأهلي لعب ماتش سريع لقدام وده فرق معاهم كتير".

ولفت:"الزمالك لو مكنش دخل فيه الجون اللى في الشوط الثاني اللى انهار فيه انهيار كامل كان ممكن يعمل نتيجة أحسن من كده، ولكن هذا لا يمنع أن الأهلي كان الأفضل والمنظم والأحسن، وعنده دكة بدلاء مرعبة، والأهلي الموسم ده لعيبته كتير والصفقات اللى عملها خلته عنده حصيلة جيدة، ومبروك للأهلي وهارد لك للزمالك، ولكن الماتش كان تقيل علينا وللحظات تخيلنا أن الماتش هيبقى بايخ على الزمالك، ولكن عودة الزمالك للمباراة بشكل جزئي الدنيا بقت أفضل وأحسن شوية".

وحقّق الأهلي انتصارًا مهمًا على غريمه الأزلي نادي الزمالك بخمسة أهداف مقابل ثلاثة أهداف، ليعتلي الأحمر صدارة ترتيب الدوري بعد الجولة الثالثة بالعلامة الكاملة إذ حقق الانتصار في المباريات الثلاث، وهو نفس رصيف نادي بيراميدز.

وبعد المباراة، أعرب موسيماني عن سعادته بالفوز على الزمالك، وقال::"فزنا على الزمالك في ملعبه بنتيجة كبيرة، كنا متميزين خططيا وأذكى منه.. قدمنا الأداء الذي ظهرنا به ضد الإسماعيلي، هذه مباراة تصل لمستوى دوري أبطال إفريقيا. سعيد بفريقي، كنت أتمنى زيادة الغلة".