لو قولتى لمامتك هموتك..تفاصيل صادمة في تحقيقات هتك عامل عرض طفلة في مدرسة بالمعادي

مفاجآت صادمة وردت في نص تحقيقات النيابة العامة في القضية رقم 18581 لسنة 2021 جنايات المعادي المتهم فيها عامل أسانسير بهتك عرض 5 طفلات في حضانة مدرسة خاصة بالمعادي.

وأمام رجال التحقيق قالت الطفلة على سبيل الاستدلال:" عمو محمد ده وحش وضربني وعورني في ضهري وأنا عضيته في أيده وعلى طول بيوجعني تحت بطني".

أقوال والد المجني عليها

وقال والد الطفلة امام النيابة العامة:" أنا جيت النيابة علشان بنتي اتهتك عرضها وهى عندها 4 سنين، واللى حصل من ثلاثة اسابيع تقريبًا بنتي لما رجعت من المدرسة ومامتها قالتلى وهي بتشطفها إنها فيها إلتهابات شديدة بس احنا سعتها مشكناش في حاجة ومامتها حنطلها كريمات لحد محصل واقعة الطفلة الأولى فاحنا ربطنا المواضيع فشكينا ان ممكن يكون موضوع الإلتهابات بسبب كده وبعدين إبتدينا نتكلم مع البنت ومامتها قعدت معها وابتدأت تسألها فالأول مكنتش عايزة تتكلم وبعدين حاولنا ندخلها في مواضيع بعيد عن الموضوع ده لحد مامتها سألتها عن في حد بيدايقها في المدرسة في قلتلها أن في واحد اسمه عمو محمد بيجرى وراهم وبيزعقلهم وبيخوفهم بالعصايا ومامتها سعتها سألتها إذا كان عم محمد ده بيشطفها او بيعملها حاجة تانية فأول مرة قلتلها اه قبل كدة شطفنى مرة واحدة وبعديها سألتها تانى قالتلها لا ده مبيشطفنيش وبعدين إحنا قلقنا فحاولنا نفهم الموضوع فقلتلنا إن عمو محمد ده بيشطفنى مرتين وكان بعديها بيغسل إيدة فأحنا سعتها أتاكدنا ان الموضوع ده حصل وروحنا على القسم وجينا على النيابة وهو ده كل اللي حصل".

وأضاف والد المجني عليها: "الكلام ده عرفته من زوجتي من ثلاث أيام تقريبا وهي بعد كدة قالتلي كل اللي حصل وقالتلي إنهم اشتكوا، وقالتلي إن عم محمد ده شرير وبيدايقني في المدرسة، بيجرى ورانا في المدرسة وشطفنى مرة واحدة، وأنا معرفوش خالص".

وأضاف والد الطفلة:" بنتي لما شافت صورة المتهم لما ورتهالها مامتها قالتلها ده عمو محمد، وقالت انه قام بتشطيفها من ناحية ظهرها وحضنها، وان يديه استطالت أماكن حساسة بجسدها، وأكيد فيه تهديد من المتهم واكراه لبنتي والتحايل عليها للنيل من مقصده، وقصده من هتك عرضها، وأنا بتهم المدرسة بالإهمال تجاه بنتي".

أقوال والدة المجني عليها

وقالت والدة المجني عليها أمام رجال التحقيق:" اللى حصل إن من حوالي ثلاث أسابيع وانا بحمى بنتى وبحاول انضفها من تحت لقيتها مش راضية وعماله تزق في إيديا فخدتها وبنشفها فببص على الحتة اللى هي خايفة منها لقيت إلتهابات وتسلخات شديدة فسألتها إيه ده قالتلى انا بهرش كثير هنا فحططلها كريم وتانى يوم كانت كويسة إلى حد ما لحد بعديها بفترة لقيت خربوش فوق منطقة الشرج فسالتها قالتلي إنها اتخبطت في الزوحليقة وقعدت تقولى أنا بهرش وبتخبط وانا صدقتها إنها اتخربشت فعلا وبصيت ساعتها على منطقة الشرج ولقيتها محمرة وكان بردو بتحصل حجات غريبة إنه مثلا يضيع منها حاجة وتانى يوم تقلى عم محمد لقاها وادهالي لحد موضوع البنت الأولى اللي حصل فانا ربط المواضيع وورتها صورته فهيا خافت جدا من الصورة وقالتلى معرفوش وبعدين في الجروب لقناهم بيقولوا إنهم عندهم نفس المشكلة فأنا ساعتها قلقت وجبت بنتى وحاولت اعرف منها اللي بيحصل في الأول قالتلى متعرفش حد  اسمه عم محمد وبعدين لما ضغط عليها شوية لحد مجت وقالتلي وقالت لبابها إن عم محمد ده بیشطفنى وعورني وقالتلى هو اللى كان مخربشها قبل كده ورا وإنها اشتكت، فسألتها إزاى قالتلي إنه بيشطفها وهي وقفه وقالتلي إنه بعد كدة بيغسل إيده فاحنا روحنا كشفنا عند دكتورة نسا وتوليد إمبارح وقالتلنا إن البنت عندها إلتهابات في المنطقة التناسلية فروحنا تاني يوم القسم وجينا على النيابة وهو ده كل  اللى حصل".

وأضافت والدة المجني عليها:" بنتي قالتلي إن عمو محمد ده بيشطفني وعورني في ضهرى وضربني وبرضو حكتلي إن كان في حفلة وكان فيها بنت اخرى وعم محمد ده ضربني على دماغي وهى ضربته وهو ضربها بالقلم، وانا معرفوش ومرحتش المدرسة خالص، وعرفت إنه تعدى على بنتى لما وريتها صورة المتهم قالتلي هو ده عم محمد اللى بيشطفنا، وهى كما قالتلى إنه قالها إنى لو قولت لمام أنا هموتك، وبتهم المتهم بهتك عرض بنتي وكذلك المدرسة بالإهمال، ومعرفش المتهم ده خالص".

موعد محاكمة المتهم

وحدد المستشار عصام فريد رئيس محكمة استئناف القاهرة، جلسة 25 يناير الجاري أمام محكمة جنايات جنوب القاهرة، لبدء  محاكمة عامل مصاعد بإحدى المدارس بمنطقة المعادي، في قضية اتهامه بارتكاب جريمة الاختطاف بالتحايل لـ 5 طفلات بالمدرسة التي يعمل بها، والمقترنة بهتك عرضهن أثناء تواجدهن بدورة مياه المدرسة.

إحالة المتهم للمحاكمة الجنائية

وكان النائب العام المستشار حمادة الصاوي قد سبق وأحال المتهم، محبوسا احتياطيا، إلى المحاكمة الجنائية أمام محكمة الجنايات، في ختام التحقيقات التي باشرتها النيابة العامة.

وأسندت النيابة إلى المتهم اتهامات بالخطف بالتحايل لخمس طالبات بالمدرسة، بأن استدرجهن لدورة المياه مستغلا رغبتهن في قضاء حاجتهن بحيلة انطلت عليهن وهي مساعدتهن في ذلك، مبعدا الطالبات عن أعين الرقباء عليهن، قاصدا ارتكاب الجريمة موضوع الاتهام.

وذكرت تحقيقات النيابة أن تلك الجريمة اقترنت بجناية أخرى تتمثل في قيام المتهم بهتك عرض المجني عليهن الطفلات، واللاتي لم يبلغن من العمر 12 عاما.

وشملت التحقيقات وأدلة الثبوت التي قدمتها النيابة العامة بحق المتهم، أقوال 16 شاهدا من بينهم أولياء أمور الطفلات المجني عليهن، والذين قالوا إنهم لفت انتباههم شعور طفلاتهن بآلام والأعياء المتكرر، وأنهم بسؤال الطفلات علموا بقيام المتهم بالتحرش بهن داخل دورة المياه الخاصة بالمدرسة، حال تطهيره لها بعد قضاء حاجتهن على الرغم من عدم اختصاصه بذلك الأمر لكونه عامل مصعد، مسببا التهابات واحمرار بتلك الأماكن، وهو الأمر الذي تحقق منه أولياء أمور الطفلات المجني عليهن.

وتضمنت أوراق القضية شهادة الشهود من الأطباء والطبيبات الذين قاموا بتوقيع الكشف الطبي على الأطفال، وكذلك الباحثات الاجتماعيات بالمجلس القومي للأمومة والطفولة واللاتي أفدن أن الطالبات المجني عليهن تعرضن للاعتداء الجنسي من قبل المتهم، وأن هذه الاعتداءات تسببت في اضطرابات سلوكية لديهن.

واحتوت أوراق القضية على التقارير التي تفيد بتوقيع الكشف الطبي الذي أظهر وجود الالتهابات لدى الاطفال المجني عليهن، فضلا عن تعرفن على المتهم بارتكاب تلك الجرائم خلال العرض القانوني الذي أجرته النيابة العامة خلال مرحلة التحقيق.