شيلوا الجامع.. طلبات خيالية لا تصدق من يوسف شاهين في كواليس فيلم الأرض وهذا رد فعل حمدي أحمد | شاهد
حكى الفنان حمدي أحمد، كواليس غريبة أثناء تصوير فيلم الأرض، خلال حلوله ضيفًا على برنامج «ساعة صفا» الذي كانت تقدمه الفنانة صفاء أبو السعود، على شبكة قنوات «Art» عام 1997.
«كان في حدوتة جميلة جدا في فيلم الأرض»، بهذه الكلمات بدأ الفنان حمدي أحمد، يحكي عن طلبات غريبة لمخرج الفيلم، يوسف شاهين، مضيفًا: «في دماغة حاجة لازم هينفذها لما تعملوا حاجة لو منفذتهاش زي ماهو عايزها اليوم ده مش هيكمل، يعني لو عايز يصور نموسة واقفة على الترابيذة لازم يتحايل ويعملوا له البدع عشان يوقف نموسة على الترابيذة».
وأكمل: «نحكي بقي الحكاية.. فيه شريوه اللي هو المنصوب في الغيطان -زي قضيب القطر بتركب عليه الكاميرا وبيمشي جنب الممثل بسرعته بحيث أن هي متبقاش سابقة- ده كان أطول شريوه في تاريخ السينما المصرية حوالي 150 متر».
وتابع: «قعدنا نجهز فيه يومين عملناه الأول 30 متر وبعدين قالوا مش هينفع أكتر من كدة يا أستاذ يوسف في شجرة، قالوا شيلوا الشجرة».
وأردف: «كان لازم عشان نشيل الشجرة نرجع لمحافظة الفيوم ومديرية الزراعة، بعدين يطلع ناس تعاين الشجرة اللي إحنا هنقطعها، فجم قالوا تقطعوا الشجرة تدفعوا تمنها، كام يا سيدي؟ 50جنية، مدير الإنتاج طلع من الميزانية 50 جنية وادهالهم وقطعناها».
«وصلنا الشريوه وكملناه» لم تتوقف طلبات شاهين عند هذا الحد بل أنها وصلت إلى ما هو أبعد من ذلك، يقول: «قالوا خلاص على كده، قال في إيه، قالوا في جامع، قالهم شيلوا الجامع، كان ستر ربنا إن إحنا اللي بنينا الجامع، جبنا الديكور اللي قعدنا 6 أيام نبنيه وشيلنا الجامع وكملنا الشريوه».
وأكمل: «كملنا وقالوا لحد كده وأنا مقدرش بقي، قال له في إيه؟، قاله له في ترعة، قال له شيل الترعة، مدير الإنتاج ومدير التصوير هم اللي كانوا بيتاقشوا معاه، اتعلمت من الواقعة دي الإصرار، لما تلاقي حاجة صح صر عليها، خصوصًا في الفن».
