«امتى المهنة تنضف؟».. هجوم ناري من أحمد فلوكس على إلهام شاهين وهادي الباجوري بسبب المشاهد الرومانسية
وجه الفنان أحمد فلوكس انتقادًا لاذعًا للمخرج هادي الباجوري، بعد تصريحاته المثيرة للجدل التي أدلى بها خلال لقائه ببرنامج «كلام الناس»، وقال فيها: «ماعنديش مشكلة زوجتي ياسمين رئيس تعمل مشهد رومانسي في أعمالها، ومقدرش أقول غير كده، لأني بعمل مشاهد رومانسية وإزاي هقولها لا؟ هتقولي إنت منافق».
ونشر«فلوكس» صورة للمخرج هادي الباجوري، عبر حسابه الرسمي بموقع التواصل الاجتماعي «فيس بوك»، وعلق عليها قائلًا: «ناس مين اللي بتسيب بناتها وزوجاتها تلبس مايوه عريان مش فاهم... اتكلم عن نفسك يا ريس وعن نوعك».
وأضاف: «أنت ماعندكش مشاكل أن مراتك تتباس ده موضوعك مش موضوعنا، براحتك.. لكن ده أنت وده نوعك انت إحنا لا.. أنت بتقول إيه.. اتقِ الله».
وتابع: «يعني واحد بيشم يبقى كل الناس شمامة واحد فاشل تبقى كل الناس فشلة، وللأسف الكلام متاخد عنوان وللأسف أنا مش فاهم يعني ولا عمل ليه ناجح حتي شريهان عودتها سواء مسرح أو إعلان مش هاتكلم ولا كأنها رجعت.. ولسه أساسا بيشتغل.. امتى المهنة دي تتعدل وتنضف بقي.. خلوها تنضف».
كما هاجم الفنان أحمد فلوكس، تصريحات الفنانة إلهام شاهين، عن القبلات في الأفلام، التي انتقدت خلالها من يرى أنها شيء منافي للأخلاق، قائلة: «المجتمع كان زمان مختلف ويتقبل القبلات في الأفلام، والمجتمع أصبح غريبًا على حد تعبيرها».
ورد عليها «فلوكس» وكتب عبر حسابه الخاص على موقع التواصل الاجتماعي الخاص به: «بعيدًا عن معزتك ممكن أستأذنك ماتتكلميش تاني في الكلام ده، البوسة بتعتبر حاليا منافيه للآداب، أومال إمتى يا فندم نعتبر الشئ منافي للآداب، لما نلاقي العيل نازل وبشهاداته كمان هنا يبقي سفالة.. الشاشة دي بتربي أجيال وبتشكل وجدان، مش بتربي وحوش وبتعمل أوضاع، على كده إحنا نعتبر الأفلام السكس أفلام تثقيفية تعليمية إرشادية الغرض منها التعليم والتمرين، سامحيني أنا بحبك بس مابقتش قادر أستحمل، يا جماعة الشيطان نفسه مش مصدق اللي إحنا كبشر بنعمله وبيستغفر ربنا، الأفلام بقت مرجعية والنوافل بقت مهرجانات والزكاه بقت نقطة والحج بقي تشكيل.. آسف جدا. ومش عاوز أسمع كلمة حريه الفن».
