«يا رب تصحى تلاقي الصراصير ماشية على وشك».. ريهام سعيد تثير الجدل برسالة غامضة

أثارت الإعلامية المعتزلة ريهام سعيد الجدل برسالة غامضة وجهتها عبر حسابها الرسمي على موقع التواصل الاجتماعي «إنستجرام».

وكتبت ريهام سعيد في منشورها: «حسبي الله ونعم الوكيل في كل مفتري وفي كل آفاق ساهم انه يقضي على مجهود سنين طويلة، حسبي الله ونعم الوكيل في كل واحد ساهم أنه يصدر فكرة غلط عني وعن شخصيتي، حسبي الله ونعم الوكيل في كل واحد جاب سيرتي عشان يشدني لمشكلة واطلع في الآخر بتاعة مشاكل لما يكون ليه رد فعل».

وتابعت ريهام سعيد: «حسبي الله ونعم الوكيل في كل واحد وقفت جنبه واتخلى عني في وقت شدة وعارفاهم بالاسم ومش ومش هانسى، حسبي الله ونعم الوكيل في كل واحد مايعرفنيش وقال كلمة وحشة عني، أنا صحيح اعتزلت لكن انتوا كل يوم بتعرفوني قد إيه أنا ناجحة ومهمة وشاطرة، عرفتوني قيمة الحياة الحقيقية وهي العيلة والاولاد وطاعة الله لكن اوعوا تستهونوا بحسبي الله ونعم الوكيل والله الحق راجع».

واستطردت: «اما بقى اللي رماني في السجن ظلم ده حسابه عند ربنا عسير، انا سبت ابني عنده شهر من غير رضاعة من غير ما اعمل أي حاجة، انا عملت كتير بس مكنتش مستنية شكرا، ومكنتش مستنية برضوا افتراء وأذى كده».

وتابعت: «كتبت الكلام ده لأني تعبت من الافتراء اللي في كل حتة والمصلحنجية فص ملح وداب والناس اللي كسبت من ورايا ملايين ورموني في الاخر وخربوا بيتي وسرقوا صفحتي اللي عليها 15 مليون.. عارفة أن ماعنديش ضهر ولا علاقات ولا نفوذ ولا حد واقف جنبي مع اني وقفت جنب ناس كتير لكن ليا رب اسمه الكريم العادل».

وأكملت: «كل اللي افترى عليا يا رب تصحي من النوم تلاقي الصراصير ماشيه على وشك زي ما تكون في قبرك، وتفضل محبوس أيام مش عارف النهار من الليل في مكان، أن شاء الله يحصل لك زي ما حصل لي عشان تعرف إني أقوي من أي حد، وباذن الله ربنا يعرفك إنك ظالم في جهنم أن شاء الله».

وواصلت: «عارفه إن معنديش ضهر ولا علاقات ولا نفوذ ولا حد واقف جنبي، مع إني وقفت جنب ناس كتير، لكن ليا رب اسمه الكريم العادل، أنا ولا أخدت صور من على موبايل ولا شتمت تخان ولا خطفت حد ولا خليت التعلب يعيط، أنا كنت في منتهي المهنية وتعبت أوي، عمري راح بخدم غيري وبخدم الناس اللي مش بترد عليه دلوقتي».

واختتمت منشورها: «أنا فخورة إني مش بوشين، حبيت بلدي أوي، دائما كنت بقول الحق، يكفيني إن محدش عرف يحقق اللي أنا حققته من غير واسطة ولا إمكانيات، أنا بتحارب بقالي ٦ سنين ولسه بتحارب بشدة في كل حتة، حتى في التمثيل معرفش ليه ومن مين، كل مره يموتوني فيها كنت بقوم عشان أولادي، عشان تعبي، وعشان الحق، يا رب يا رب يا رب أشوف حقي راجع من كل اللي ظلمني قبل ما أموت، برنامجي كان السابع على العالم، كل تهمتي إني نجحت، أنا اسفة».