قلب أختك.. مها أحمد تنهي خلافها مع أحمد السقا بهذه الطريقة | شاهد
أنهت الفنانة مها أحمد خلافها مع الفنان أحمد السقا بعد ما يقرب من عام، حيث وصفته بأنه لا يصون العيش والملح، نظرًا لطلبها منه أن يجعلها تشارك معه في أعماله، لكنه لم يفعل.
ونشرت مها أحمد صورة تجمع بينها وبين أحمد السقا عبر حسابها الشخصي على موقع التواصل الاجتماعي «إنستجرام” وعلقت عليها: «يا أحمد يا سقا فين هدية عيد الأم، خلي بالك داخل علينا رمضان، هتبقى هدية عيد أم وياميش رمضان، أنت حر كل سنة وأنت طيب يا قلب أختك ورمضان كريم”.
كانت الفنانة مها أحمد قد نشرت، منذ أشهر، بوست عبر «فيسبوك» وكتبت: «عوضي على الله.. دي الجملة اللي دايما بقولها لما اتصدم في أشخاص، الحكاية ياسادة نجمين عملوا مسلسل واتنجمت عليهم بنوتة لسه ألف باء تمثيل إلى أن أصبحت بطلة المسلسل وبطلة الدعاية للمسلسل وهما راضين رغم إن طول عمرهم مبيعملوش كده مع أي زميلة لهم أقربها أنا”.
وتابعت: «النجم الأولاني بيني وبينه عيش وملح وزمالة.. رُشحت في مسلسل بطولته وكان بيقنعني بدور ولما وافقت بعتولي دور تاني معرفوش.. دور متعملوش واحدة مبتدئة.. المفروض أنه عارف قيمتي الفنية وعارف أني إضافة له.. اتهرب مني وموقفش جنبي وباعني رغم إن الكل عارف أني زي أخته (ندل)”.
وأضافت: «أما التاني كان بداياته يتمنى يسلم عليا ويقولي يا أستاذة.. نزلت من نفسي وقلتله مش هنشتغل مع بعض.. ماهي الحوجة مرة.. رد وقالي الدور بينادي صاحبه.. طبعا محكلكوش أد إيه ندمت نفسي وعشت أسود أيام حياتي عياط واكتئاب وقلت عوضي عليك يارب”.
في المقابل، علقت «نادية” والدة السقا عبر صفحتها الشخصية بموقع «فيسبوك»: «على الأصل دور كومبارس فاشلة تتطاول وتسب فنانين كبار، وتعلق فشلها عليهم، تبحث عن الشهرة بطريقة بذيئة مهما حاولتي يا كومبارس ليس لكي مكان بين الفنانين المحترمين، وإن طلع العيب من أهل العيب ما يبقاش عيب”.
فيما قالت فاطمة شقيقة السقا، عبر صفحتها على «فيسبوك»: «الكلام ده موجه ليكي يا أستاذة، بدل ما تفضلي تمسحي ردي كل شوية.. أبهرتيني يا مها بأخلاقك العالية، وبأنك افتكرتي العيش والملح اللي كلتيه في البيت بتاع الفنان اللي مش عارفة تقولي اسمه بس عرفتي تقولي عليه (ندل) اللي هو أحمد السقا.. بس أنا باقولك قدام الناس، قطع لسان أي حد يقول عليه كده لأنه راجل أكرمك ووقف جنبك أنت ومجدي بدل المرة ألف”.
وأضافت قائلة: «أمير كرارة برضو راجل جدع ومحترم للي ما يعرفهوش في البوست بتاعك ده.. معرفش إيه الفرص اللي كانت عندك اللي كان يتمنى يشتغل معاكي فيها زمان، بس هو أي حد يتمنى يشتغل معاه دلوقتى أكيد.. وكلمة الدور بينادي صاحبه دي بتاعة أفلام.. ما بتتقالش في الحقيقة.. كفاية دراما وتشويه للناس”.
وتابعت: «وبعدين هما كممثلين مش مطالبين يقفوا جنبك ولا يجيبولك أدوار على فكرة.. دي رؤية مخرج وناس بتوع كاستنج، الحقيقة أنا مش عارفة إنتي عايزة إيه.. أنا مش شايفة بعد العشرة الطويلة اللي أنت قولتي عليها غير كمية الحقد والسواد والشماتة اللي كانوا متداريين ورا ابتسامة كدابة، معرفش أنت إزاي كنتي بتدخلي بيوتنا الصراحة وأنت ست وحشة كده”.
واختتمت كلامها قائلة: «نسيت أقولك السب والتطاول ده بيدل على الأصل.. وإحنا بقى ولاد ناس، مع أننا عندنا كلام كتير أوي يتقال».
