ورق البفرة أرخص من ورق العنب.. هكذا سخر المواطنون من ارتفاع الأسعار

مع بداية شهر رمضان شهدت أسعار السلع الغذائية ووالخضراوات واللحوم ارتفاعا جنونيا، لكن ورق العنب ارتفع بشكل غير مسبوق، حيث تداول رواد مواقع التواصل الاجتماعى «إيفيهات ضاحكة ساخرة»، حول وصول سعر ورق العنب إلى 70 و80 جنيها، كما أجرت المصري اليوم جولة بالأسواق لاستطلاع آراء المواطنين حول هذا الارتفاع.

وقال أحد رواد موقع التواصل الاجتماعي، «مش هنلف ورق عنب.. هنلف ورق بفره»، ويعتبر ورق العنب واحد من الأطباق الرئيسية، خاصه أول يوم رمضان وفى العزومات.

من جانبه قالت «أميره» مدرسة: «والله لولا ن بنتى بتحبه عمرى ما كنت هجيبه، جبتلها ربع كيلو بس، علشان ده ظلم واستغلال، كل بائع يقولى علشان الدولار والبورصة والحرب، طيب احنا نعمل ايه»، مضيفة «لو عندى عزومة وحد طلبه مش هجيبه.. اللى نفسه في حاجه ياكلها في بيته».

بينما أوضحت سعاد، موظفة، «قولت لجوزى عندى عزومة وعايزين كيلو ورق عنب بـ80 جنيه، قالى وهو بيضحك.. ورق البفرة في الدرج خدى شويه ولفى».

وأوضحت عبير«ربه منزل»: «ماله ورق الخس وورق البصل الأخضر، والله مفيد ورخيص، مش هنموت يعنى لو مكلناش ورق عنب»، مضيفة «لو عندى عزومة أمرى إلى الله، هجيب كام ورقة وأعملهم».

أما بالنسبه لـ«شريف» الذي يعمل موظفا فقال: «أنا قولت لمراتى مفيش حاجة اسمها سوق احنا نخلص الرز والمكرونة اللى عندنا الأول، خضار ايه بس، مش هنموت يعنى»، مضيفا «أنا اللى هموت من الأسعار».

وقال أحد البائعين في أسواق الخضراوات: «هنعمل أيه.. كل حاجه بقت غالية، والله احنا بنعذر الناس اللى بتشترى، وهما كمان لازم يعذرونا، مش بايدينا، ربنا يرحمنا».

وأضاف «بائع آخر»: «الناس هي اللى عامله كده، ميشتروش وكل حاجه سعرها هيقل، لكن لم دى تجيب كيلو ودى نص ودى ربع هيفضل غالى».