دلوقتي الشغل بيدور عليا..رد ناري من محمد رمضان على تصريحات انتصار

رد النجم محمد رمضان، على تصريحات الفنانة انتصار عنه خلال الساعات الماضية ببرنامج "العرافة".

وأعاد رمضان، نشر تصريحات إنتصار عنه عبر حسابه على "فيسبوك"، وعلق: "كنت بدور على شغل يا انتصار.. دلوقتي الشغل بيدور عليا.. الحمدلله".

وكانت الفنانة انتصار، تحدثت عن علاقتها بالنجم محمد رمضان، وذكرى لا تنساها حدثت في مسرح البالون.

وقالت أثناء استضافتها في برنامج "العرافة": "علاقتي بمحمد رمضان قوية، أنا بمثله حاجة مهمة، وهو كمان بيمثلي ذكرى مهمة، وهو اللي فكرني بيها، كان هو لسه مش معروف وصغير شوية كده، وأنا كنت أصغر، كنا في مسرح البالون، وكان بيمشي معاه واحد صاحبه شبهه قوي، وكانوا ماشيين بشنطة هاند باج على كتفهم، وكأنهم خارجين من المدرسة، ودخلوا مسرح البالون، كان إبراهيم نصر الله يرحمه ومحسن حلمي المخرج الله يرحمه، ومعانا حد تاني جوه الخشبة، فأنا قولتله عايز إيه يا حبيبي، أنا الوحيد اللي انتبهت له كان صغنن، قالي إحنا بنلف في المسارح وبندور على شغل، على فكرة هو اللي فكرني".

وتابعت: "أنا اتخضيت، أنا كويسة بجد، قولتله طب إنت عايز تعمل ايه إحنا بنعمل بروفات وممكن يزعقوا، فقالي احنا بنلف على المسارح، وعاوزين نوريله، كان عارف أن ده محسن حلمي قولتله طيب، طبعا أنا خايفة، ممكن يقولي مش عايز حد يعطلني، قولتله في شباب صغنين عايزين يعملوا مشهد، لقاني متحمسة، قالي طيب ماشي هاتيهم، بصيت في عين إبراهيم نصر، ممكن يقولي إيه في إيه، قالي إيه يا مامي يلا، ماجتش على الخمس دقايق دول، فوقف خد بووز وكأنه واقف قدام الجمهور، وقالي أنا هقلد أحمد زكي أو محمد سعد مش فاكرة، وزميله عمل الشخصية التانية، تقريبا هو عمل أحمد زكي، وعمله حلو قوي، ووشه وكله، وبعد كده التاني عمل الشخصية التانية، فخلص وقت كتير يعني، ويعدين أنا صقفت، ومحسن صقف، والتاني قال برافو يا ولاد، إنتوا في سنة كام، مجاملة يعني هو عنده هم أكبر المسرحية، قولتلهم هايلين، بس لازم تمشوا دلوقتي، مش قادرة أستحمل ريسك أكبر من كده، خايفة أنا اتشاط، صعب عليا إنهم جايين من الضلمة وبالليل".

وأضافت: "كنا في مهرجان القاهرة السينمائي الدولي وكان ليه فيلم مع سوسن بدر، وفي حفلة المهرجان نفسها بعد الافتتاح، بنروح مكان نتجمع فيه ومعانا الأجانب ولجنة التحكيم، فقالي إزيك يا انتصار كان طالع، قولتله أزيك يامحمد إنت عامل، كان طول شوية عن الفترة اللي فاتت بس متغيرش، قولتله فاكره إيه، قالي خلاص بقا، قالي فاكرة الولد الصغير اللي كان معاه صاحبه ودخل مسرح البالون وكان إبراهيم نصر على المسرح، وهو كان عايز يقلد فنانين وقولتيله يلا خش، أنا مهتمتش بيه، اهتميت إزاي أنا عملت كده، والنتيجة كانت سليمة بدليل إنه بيمثل أهو، دلوقتي وشه تخن شوية، وعايز يخلي الدنيا كلها تحس باللي هو حاسه".

يذكر أن محمد رمضان يخوض دراما رمضان 2022 بمسلسل "المشوار" ويشاركه البطولة دينا الشربيني (ورد)، وأحمد مجدي وصبري فواز وأحمد كمال (وجيه بيه)، وصبري عبد المنعم وبيومي فؤاد وعمرو عبد الجليل، غادة طلعت، ندى موسى، وغيرهم، ومن تأليف محمد فريد، وإخراج محمد ياسين.