ربنا بعتهولي.. حنان ماضي تكشف سر ارتدائها الحجاب وتفجر مفاجآت عن حياتها | فيديو

حلت المطربة الكبيرة حنان ماضي، ضيفة ببرنامج "كلام الناس" الذي يعرض على "MBC مصر"، في أول ظهور لها بالحجاب، وتحدثت خلال الحلقة عن الكثير من المحطات الفنية الهامة في مسيرتها الفنية.

نستعرض لكم أبرز ما قالته حنان ماضي في الحلقة بالسطور التالية:

- "تعرضت للإصابة بفيروس كورونا وبالتحديد متحور أوميكرون، وقبل كده كنت احرص على اتباع الإجراءات الاحترازية، وبنتي وأختي تعرضا للإصابة بمتحور أوميكرون، وتم الشفاء منه بسرعة ولكن أنا اللي طول معايا شوية، وكنت بموت".

- "اتخذت قرار ارتداء الحجاب من فترة قريبة.. لقيت الشيخ أبو بكر بيقول حاجة عن الحجاب.. حسيت أن ربنا بعتهولي، يعني خلاص، تفكيري كان تفكير واحدة بتموت، فقررت أن أرتدي الحجاب والحمد لله".

- "حاسة إن قرار الحجاب أحلى حاجة حصلت لي.. وارتداء الحجاب كان مفاجأة لبنتي.. وقالت لي معقولة.. وسألتني هل هتغني بالحجاب؟.. ومكنش ناقص غير الطرحة بس.. وأكتر حاجة وحشة الدبابيس.. وبحاول ألبس الحجاب من غير دبابيس".

- "لم أتشاور مع أحد في قرار ارتداء الحجاب، وده كان قراري، أنا بعمل ده لربنا.. أنا عاوزة رضا ربنا.. حد هيراجعني فيها ازاي؟".

- "الحجاب لم يكن مقدمة للاعتزال، وبعدها جالي أغنية.. الحجاب ده حاجة لربنا، وفكرة الحجاب جاتلي مؤخرا".

- كشفت أنها كانت تنوي اجراء عملية تجميل، ولكنها تراجعت على الفور، حيث أنها كانت متحمسة لإزالة "اللغد"، ولكن بعد الحجاب أزاحت الفكرة تماما.

- بعد الحجاب جالي أغنية في آخر حلقة من (أبو العروسة) وكنت تعبانة، لكن غنيت.

- روت قصة حصولها على 5 جنيه من أم كلثوم، قائلة: "بابا خدني معاه في بروفة تخص أم كلثوم.. في استديو 46 في الإذاعة، وبعد ما دخلنا فتحت البيانو لحد لما الست أم كلثوم تيجي، هي داخلة قفلوا البيانو عليا وعلى صوابعي.. روحت مضايقة أوي ازاي تقفلوا البيانو، وجت سلمت عليا وخلتني أقعد جنبها، واحنا في البروفة والسيدة أم كلثوم بتغني عادي.. فجأة الدنيا ضلمت.. أنا اتفزعت وهي حست بيا وراحت وخداني في حضنها وهى بتغني، هي قاعدة تغني وأنا مرعوبة، غني زي ما تغني وأنا مرعوبة ومكنتش شايفة كف أيدي أصلا.. بعد كده قاعدين في البروفة والنور مقطوع، ولما الكهرباء رجعت قعدت تطبطب عليا وتضحك، وقالتلي برافو عليكي وانتي مخوفتيش، وراحت مطلعة 5 جنيه وادتهالي، الحمد لله كانت حاجة لذيذة أوي".

- "أنا بكره المطبخ، وبحب أعمل الأكل السريع، وعمل المحشي في ساعتين علشان تتاكل في 5 دقائق.. ظلم".

- "بعمل الملوخية في 5 دقائق، وأنا ست بيت عادية جدا، وبكون في البيت براحتي جدا".

- "كان عندي أصدقاء واخوات وقفوا جنبي بعد قرار الانفصال، الحمد لله".

- عمر كمال صوته رائع، متابعة: "قبل ما يعمل أغنية بنت الجيران كان صوته زي محمد فؤاد، ولما عمل الأغنية خرج من عباءة محمد فؤاد فنجح.. متجبيش شبه حد موجود وتقوليله ينجح مش هينجح حتى لو أحسن من الأصل هيفضل محمد فؤاد هو محمد فؤاد".

- "بداية حبي للغناء جاء بسبب حبي في صفاء أبو السعود، وأغانيها كانت جميلة".

جدير بالذكر أن المطربة حنان ماضي تعد واحدة من مطربي التسعينات وتتمتع بصوت دافئ وعذب، وهي من مواليد عام ١٩٦٦ بمحافظة القاهرة، وكان والدها عضوا في فرقة أم كلثوم. واكتشفها الموسيقار الكبير عمر خيرت وزوجها السابق الموسيقار ياسر عبدالرحمن بعد أن كانا عازفين كمان في فرقته، وشكلت "حنان" ثنائيًا ناجحًا مع الموسيقار ياسر عبدالرحمن، ولمعت خلال فترة التسعينات، وقدمت عدة ألبومات ناجحة مثل: عصفور المطر، ليلة عشق، إحساس، وشباك قديم.