هالة هي اللي اتجوزتني ومعملتش فرح.. ماذا قال عادل إمام عن قصة زواجه ؟ | فيديو

يحتفل النجم الكبير عادل إمام بعيد ميلاده الـ82 هذا العام، إذ أنه من مواليد 17 مايو 1940، وبهذه المناسبة نستعرض لكم كيف لعبت الصدفة دورا هاما في تعرفه على زوجته هالة الشلقاني والدة أبناءه الثلاثة "رامي وسارة ومحمد".

وتحدث "الزعيم" عادل إمام وزوجته هالة الشلقاني، عن قصة زواجهما في لقاء تليفزيوني نادر، وقالت هالة: "كان سمير خفاجة جار لي، وكانت المسافة بين الشباك والشباك متر، وكنت عايشة مع جدتي، وفجأة ببص من الشباك لقيت صحاب (سمير) قاعدين وبيبصوا عليا، والوحيد عادل إمام اللي محاولش يعاكس فيهم أو يبص أو يتكلم، وده لفت انتباهي ونظري ليه".

ووجه المذيع جملة لها، قال فيها: "عادل إمام في مرة قالي.. هالة هى اللي اتجوزتني"، فردت عليه، قائلة: "أنا اللي أصريت إن إحنا نتجوز، وهو كـ شاب كان بيخاف يدخل في مسئولية جديدة، وفي يوم من الأيام قالي أنا مبفكرش في الإرتباط".

فيما قال النجم الكبير عادل إمام، بنفس الفيديو: "كنا قاعدين عند سمير خفاجة، وفجأة لقينا الشباك اتفتح، وخرج منه شيء مبهج وله حضور، وكل اللي حواليا حاولوا يعاكسوها، وأنا الوحيد اللي محاولتش أعاكسها، لأني معرفش أعاكس أساسا".

وتابع: "وأول ما عرفتها قولتلها احنا مش هنجوز، وهتبقى صداقة.. واتجوزنا بعد سنة، وبعد الزواج قولتلها نأجل الإنجاب، وبعدها خلفنا وجبنا (رامي)، وقولتلها كفاية طفل واحد، فحملت بعد كده وجابت (سارة)، وبعدها خلفت (محمد)، وبعدها قولتلها كفاية كدا".

وأضاف: "لما اتجوزنا، معملناش فرح، وقولنا الفلوس اللي هتتصرف في الفرح ممكن تتوظف في مسائل تانية، وكنت وقتها فقير، ومكنش عندي إمكانيات إني أتجوز أو ألبس كويس، وحاجات كتير جدا".

يذكر أن آخر الأعمال الفنية التي قدمها عادل إمام في الدراما التليفزيونية مسلسل "فلانتينو" عام 2020، وشارك في بطولته الفنانة الراحلة دلال عبدالعزيز وحمدي الميرغني ومحمد الكيلاني وهدى المفتي وبدرية طلبة وإنعام الجريتلي ووفاء صادق، ومن تأليف أيمن بهجت قمر، ومن إخراج رامي إمام.