أماته مرة وغيّر اسمه 3 مرات.. كيف تحدث سمير صبري عن ابنه؟ | شاهد
ما بين النفي والتأكيد من مقربين منه، مازالت حقيقة وجود ابن للفنان الكبير سمير صبري، تشغل بال الجمهور ومحبي النجم الراحل، فمنذ رحيله اختلفت التصريحات التي نطالعها بشكل شبه يومي عن ابن سمير صبري، والمفارقة أننا حينما بحثنا عما قاله سمير صبري نفسه عن ابنه وجدنا أنه كان متناقضا، ما بين تغييره لاسمه في تصريحات، وحياته ومماته في أخرى.
نرصد تلك التصريحات في السطور التالية مع مراعاة ترتيبها من الأقدم للأحدث لرصد اختلاف ما قاله حول نجله، ومع مراعاة أيضا التطرق فقط للتصريحات التليفزيونية الموثقة للفنان الكبير الراحل.
سمير صبري: ابني اسمه "جلال" على اسم أبويا ومهنته دكتور وعنده 36 سنة
في مايو 2015، سأله الإعلامي مفيد فوزي ببرنامجه "مفاتيح" عبر قناة "دريم"، قائلا: "حد بيقولك يا أبو جلال؟"، فعقب قائلا: "لأ مفيش"، فأضاف فوزي: "معرفش ليه خطر في بالي إني أقولك يا أبو جلال لأني عايز الناس تعرف اللقب ده هو لقب ابنك جلال"، فرد صبري: "أيوه.. هو اسم أبويا كمان بالمناسبة.. أنا اسمي سمير جلال صبري.. أنا اختارت لابني اسم جلال سمير صبري".
سأله فوزي مجددا: "جلال ده عمره كام سنة دلوقتي؟"، فرد ضاحكا: "كتير.. أصل أنا لما بشوف بنتك حنان دلوقتي وهي عروسة وبتكتب كتب اللي أنا كنت بشيلها على رجلي وأدلعها، بقول يا خبر أبيض على السنين اللي فاتت، مازالت بنتك حنان بالنسبالي هي الصغيرة دي، ومازال جلال بالنسبالي هو الصغير ده، وفي عقليتي بتعامل معاه على أنه بيبي وطفل وهو عمره حاليا 36 سنة، وهو في لندن، وبيشتغل دكتور بشري، ووالدته إنجليزية وماتت الله يرحمها، اتعرفت عليها وأنا في كلية الآداب في الإسكندرية".
سمير صبري: ابني مات وكان اسمه "علي" على اسم أخويا
في فبراير 2016، قال سمير صبري في حواره مع الإعلامي عمرو الليثي في برنامج "واحد من الناس" عبر قناة "الحياة"، إنه تزوج سرا لمدة 4 سنوات قبل أن ينفصل عنها. وسأله الليثي: "هل دي الزيجة الوحيدة في حياتك؟"، فرد: "تقريبا.. وحط تحت تقريبا دي 30 خط"، وسأله الليثي: "مش حاسس إنك بتفتقد الأولاد في حياتك؟"، فرد: "اللي بشوفه حواليا بيخليني أقول الحمد لله، من التصرفات اللي بشوفها في ولاد أختي"، وسأله الليثي: "لم تنجب من زوجتك الأولى؟"، فرد: "حصل، وباي باي.. مات.. كان ولد.. وسميته (علي) على اسم أخويا.. هي لما انفصلت راحت إنجلترا.. واشتغلت مدرسة للمعوقين.. وهي كمان توفيت".
سمير صبري: ابني "حسن" متجوز ومخلف.. وعندي حفيدين وبيتكلموا عربي
في أبريل 2017، قال سمير صبري خلال حواره ببرنامج "فحص شامل" مع الإعلامية راغدة شلهوب عبر قناة "الحياة": "أنا محدش كان شايف إني ممكن أكوب رب عائلة، أنا ابني (حسن) غير مقيم في مصر، في إنجلترا، ومتجوز ومخلف، هو طبيب وبعيد تماما عن الفن، ومن صغره وهو هناك مع أمه.. بشوف (حسن) كل شهرين تلاتة بروح لندن، عندي حفيدين، أنا جد كويس جدا، بيقولوا (سام) و(سمسم)، وبيتكلموا عربي، الوقت اللي بقضيه في السفر هناك هو اللي بيديني شحنة".
سمير صبري: اتجوزت وأنا عندي 19 سنة ومخلف كمان
في مايو 2018، قال الفنان سمير صبري، خلال حواره ببرنامج "شيخ الحارة" مع الإعلامية بسمة وهبة عبر قناة "القاهرة والناس": "أنا اتجوزت.. مين قال إني متجوزتش.. وأنا ضد حكاية العرفي خالص.. بس اتجوزت عرفي.. اتجوزت مرتين دي فيها حاجة؟ مش لازم أعلن.. البيت والأسرة خط أحمر.. ده كان زمان خالص.. أنا اتجوزت ومخلف كمان.. اتجوزت من بنت إنجليزية وأنا عندي 19 سنة، من غير ما أبويا وأمي يعرفوا.. في السر.. عشانا مع بعض 4 سنين ومحدش يعرف.. أنا خلبوص.. وعلاقاتي كانت كثيرة جدا.. ومع نجمات كتيرة في الوسط الفني".
سمير صبري: عندي 3 أحفاد دلوقتي
في ديسمبر 2020، قال سمير صبري خلال حواره مع الإعلامي محمود سعد ببرنامج "باب الخلق" عبر قناة "النهار": "أنا حبيبت واتجوزت من إنجليزية وأنا عندي 19 سنة، بعد ما خلصت جامعة، اتجوزت في السر عشان مقدرتش أواجه أبويا وأمي، ولكن نداهة الفن خليتني مش شايف إني عايز أمثل وأبقى نجم، ومبقتش قادر أشيل أي مسئولية غير تقدمي في الفن، وأنا بندم على ده حاليا، مقدرتش أعمل توازن بين الأسرة والفن، تحسرت وندمت لما هي سابتني وراحت إنجلترا عشان تولد، وكان عندها حق.. خدت ابني ومشيت.. ومرجعتش تاني غير بعدين بقى.. وأنا عندي 3 أحفاد دلوقتي".
سمير صبري: ابني اسمه "حسن" وزي الفل وعايش في نيوكاسل
في يناير 2021، حل سمير صبري ضيفا على برنامج "واحد من الناس" مجددا، وسأله الإعلامي عمرو الليثي: "ابنك أخباره إيه؟"، فرد: "زي الفل.. الحمد لله"، وسأله الليثي: "عنده كام سنة؟"، فرد: "بلاش كام سنة دي.. خلينا حلوين.. فوق الـ30.. عايش في نيوكاسل في إنجلترا.. من زمان لأن أمه كانت من البلد دي"، فسأله الليثي: "اسمه إيه؟"، فرد باستنكار: "اسمه إيه! ليه هتروحله يعني؟ هو دكتور.. اسمه حسن.. ودايما كنت بعمل حسن ده في الأفلام.. وعندي 3 أحفاد.. طارق ونيللي وفايزة"، وسأله الليثي: "بيتصل بيك وبتلتقي بابنك وبتشوفه؟"، فرد: "كان.. قبل السفر.. دلوقتي صعب.. من فبراير اللي فات مشوفناش بعض".
سمير صبري: ابني بيجي مصر وبيركب معايا العربية وبيشوف نجوميتي
في ديسمبر 2021، قال سمير صبري في حواره مع الإعلامية لميس الحديدي ببرنامج "كلمة أخيرة" عبر قناة ON: "أنا اتجوزت وأنا عندي 20 سنة.. كانت إنجليزية.. اتجوزنا في السر لأني خوفت أقول لأبويا.. استمر جوازنا فترة، بسبب إني كنت ملهوف إني أمثل، هي مكانتش قادرة تتمشى معايا في الجو ده، مكنش عاجبها وسطنا وحياتي، ولما حملت قالتلي هروح لندن عند والدتها تولد هناك، وقالتلي تعالى، كان الاختيار صعب ما بين الأفلام ولا الست اللي أنا تجوزتها وابني اللي أنا مكنتش شوفته وقتها، لو رجعت بيا السنين كنت روحت، كنت حاولت أجمع ما بين أسرتي وطموحي الشخصي، ابني دلوقتي مسافر وعندي 3 أحفاد في لندن، بروح وبيجوا، ولكن بقالنا سنتين مش عارفين نلتقي ببعض بسبب الوباء، حماتي وحمايا وهي كمان ماتت، وابني دكتور وسعيد جدا، هو بيجي مصر، وبيركب معايا العربية وبيشوف نجوميتي ولمس حب الناس ليّا، وقالي دلوقتي فهمت سبب إنك ضحيت بينا عشان خاطر حب الناس دي كلها ليك".
سمير صبري توفي ظهر الجمعة 20 مايو 2022، بعد صراع مع المرض عن عمر يناهز 85 عامًا، تاركًا إرثا كبيرا، على مستوى التقديم التليفزيوني والإذاعي، إلى جانب الإنتاج والتمثيل والغناء، ومن أشهر أعماله السينمائية: "دموع صاحبة الجلالة"، "جحيم تحت الماء"، "حب وكبرياء"، "السلخانة"، "عالم عيال عيال" وغيرها.
