معرفش حاجة وعيب الكلام ده.. تعليق ناري من محمود سعد على جدل أبناء سمير صبري وزواجه من فنانة مشهورة | فيديو

تحدَّث الإعلامي محمود سعد، عن ما تم تداوله خلال الأيام القليلة الماضية، بشأن إنجاب الفنان الراحل سمير صبري، ولد من زواجه بفنانة مشهورة، قائلًا: "أعرف سمير صبري والتقيته مرَّات عديدة وشرفني بلقاء طويل في منزلي وقرأت كتابه، وقال فيه إنَّه تزوَّج وخلِّف ومكنتش أعرف ده قبل كده وعمري ما سألته، وطالما قال كده يبقى عنده ولد، وهو اتجوز وهو عنده 19 عامًا وبكده عمر ابنه تعدى الـ60 عامًا، حسب ما بيتحكي، وبدأت الناس تلمح عن الشائعة اللي طالته.

وأضاف سعد، عبر فيديو نشره على صفحته الرسمية على فيسبوك: "طارق الشناوي شاف سمير صبري كتير وممكن يكون راح بيته، ومحمد عشوب قال إن عنده ولد وقال إنه عارف وهو كان قريب من سمير، وقال إنه عنده ولد من فنانة معروفة.. أنا شخصيًّا معرفش واللي عارف حاجة يقولها واللي ميعرفش ميقولش".

وأشار إلى أنَّه يعرف الراحل سمير صبري جيدًا، لكنه لا يعلم شيء عن حياته الشخصية، مضيفًا: "موضوع أنه كتب الميراث لبنت أخته، فممكن يكون ظروفها سيئة ومحتاجة ويبقى عند ابن ظروفه كويسة، وبلاش نقول تلميحات على واحد في ذمة الله والراجل قدم حاجات حلوة وله سبق في أشياء كثيرة أساسها الإذاعة كمذيع، ولو عنده ابن هيظهر، وفكرة إن سمير صبري عنده ابن من فنانة، أمر شائك جدًا ميصحش كده".

وأكد أنه يصعب أن ينكر أحد معرفته بسمير صبري، وأنه قابله وأجرى حوارا معه، بعد قراءة مذكراته التي كشف خلالها عن زواجه من بريطانية وإنجابهما لابن، وأوضح: "هل أنا كنت عارف كده؟ لا معرفش وعمري ما سألته، بس هو سمير قال كده، يبقى عنده ولد".

وتابع محمود سعد: "لو اتجوز وعمره 19 سنة يبقى لما نيجي نحسبها يبقى الولد يبقى ضروري دلوقتي سنه فوق الـ60، وفي ناس بدأت تقول كلام هنا وكلام هنا والناس تهتم، وكأن البعض عايز يلمح للإشاعة اللي طاردت سمير صبري".

وأشار إلى أن الجدل تحول إلى محاولة طرف لإثبات عدم إنجاب سمير صبري لأي أبناء، وتحدث عن التصريحات المتبادلة بين الناقد طارق الشناوي والماكيير محمد عشوب، وتبني كل منهما لرواية حول ابن سمير صبري.

وأضاف محمود سعد: "طارق الشناوي شاف سمير كتير، أنا مارحتش بيت سمير أبدا، لكن طارق ممكن يكون راح وماشافش صور، فخمن"، مشيرا إلى أن محمد عشوب كان كذلك مقربا من سمير صبري الذي كان يرتدي الشعر المستعار باستمرار.

وأردف: "عشوب بيقول ده في ابن تاني من فنانة، وأنا معرفش القصة دي، لكن أرجو اللي يعرف حاجة يقولها، واللي مايعرفش حاجة يقول معرفش، أنا شخصيا معرفش".

ورد محمود سعد على ما ذكره محمد عشوب بأن سمير صبري حكى له عن ابنه، وأوضح: "أعرف سمير كويس لكن معرفش حاجة شخصية، كونه كتب فلوسه لبنت أخته، ممكن يكون معندوش ابن وممكن يبقى عنده ابن وظروفه كويسة وبنت أخته محتاجة الفلوس دي، ومنعرفش سمير سايب أيه أساسا".

وأكد: "لو له ابن هيظهر، مالوش ابن مش هيظهر، وبعدين حكاية الفنانة اللي عندها ابن من سمير صبري، دي شائكة جدا، مايصحش كده، عيب، دلوقتي تبدأ الناس تقول مين الفنانة اللي عندها ابن عمره 17 سنة ومالوش أب معلن".

وطلب محمود سعد من الجمهور تجاهل تلك الأخبار حتى لا يساعدوا مروجيها على تكرار الحديث عنها، وقال: "معرفش الفنانة دي موجودة ولا لأ، والولد موجود ولا لأ، بس عشوب اللي قال، بس ليه كده؟ أيه الغرض؟".

وأشار إلى ضرورة احترام رغبة الفنانة والابن في إعلان المعلومات من عدمه، وأن ذلك تقليد للغرب في سلوكيات غير جيدة.