حد يفضي البحر للمدام.. سيدة تثير الجدل بفيديو جديد من الساحل الشمالي | شاهد

من جديد تثير أسعار الساحل الشمالي حالة من الاستغراب والحيرة والجدل بين متابعي مواقع التواصل الاجتماعي حيث حقق مقطع فيديو جديد لسيدة آلاف المشاهدات وهي تتحدث  فيه عن استيائها من تزاحم المواطنين داخل أحد شواطىء الساحل الشمالي. 

سيدة تثير الجدل بفيديو جديد من الساحل الشمالي

وقالت السيدة التي تدعي «داليا رويحي» في مقطع الفيديو الذي لم تتعد مدته دقيقة على تطبيق «تيك توك»: «عارفين أنا فين..أنا في بيتش في مراسي الساحل الشمالي، لكن بصوا الزحمة كأنك في الإسكندرية أو المعمورة حاجة مش ممكن، كمية الناس لدرجة إنه جوه البحر مش قادرة أعوم كويس من الناس أو الأطفال، حاجة مش ممكن بجد».

ولاقي فيديو السيدة رواجا كبيرا خاصة على تطبيق «فيسبوك» وسط تعليقات ساخرة من مضمون الفيديو وتعليقات مثل: «حد يفضى البحر للمدام الله يبارك فيكم» «يالا يا شباب فضوا البحر عشان طنط عايزة تعوم» «مزعلين طنط ليه يا عشوائيين يا بتوع مراسي» «تعرفى شاطئ النرجس أو شوفتي شواطىء الصين» «روحي في الشتا يا استاذه». 

رجل يثير الجدل بفيديو عن تضارب أسعار الساحل الشمالي

وخلال الأيام الماضية، حقق مقطع فيديو لأحد الرجال المصريين ملايين المشاهدات عبر تطبيقات السوشيال ميديا يتحدث فيه عن استيائه من تضارب أسعار فيلات الساحل الشمالي دون التأكيد على مدى جدية حديثه في مقطع الفيديو من عدمه.

«فيلا بـ 100 مليون جمبها واحدة بـ 40».. بهذه الجملة عبر الرجل في مقطع الفيديو المتداول بكثرة عن غضبه من عدم المساوة في تجاور فيلات الساحل الشمالي طبقا  للأسعار، مضيفا: «إحنا شاريين فيلا الساحل عشان ننسى التعب والمجهود اللي بنبذله في حياتنا عشان نحقق صفقات نجيب بيها الفلوس دي ونعرف ننبسط ونقضى وقت جميل في أملاكنا».

وعن سبب دفعه الملايين في شالية أو فيلا بالساحل الشمالي، أضاف مستخدم مواقع التواصل: «بالنسبة للناس اللي بتتكلم علينا، وبتقول فيه ناس بتشتري فيلا في مارينا والساحل بـ 105 مليون جنيه، دي أرزاق يا جماعة عشان محدش يزعل، ثانيا إحنا ناس بتحب الخصوصية جدا جدا جدا فوق ما تتصورا».

«اوعوا تفتكروا إن إحنا مبسوطين بالعكس».. بهذه الجملة نوه مستخدم مواقع التواصل عن سبب تسجيله للفيديو المثير للجدل عن أسعار فيلات الساحل الشمالي، مبينا: «الشئ اللي خلاني أعملكم الفيديو ده، هو عشان إني عايز أقولكم متزعلوش أوي يا جماعة، ما هو زي مانتوا زعلانين إن فيه ناس معاها فلوس تشتري فيلل، إحنا فوجئنا إن فيه معانا في نفس المكان فيلل بـ 40 و17 و9 مليون، وده شيئ حزني جدا وأنا بفكر إني مروحش الشالية  بتاعي أو الفيلا بتاعتي يا إما أسيبها.. مش عارف.. انا لسه مقررتش».

ولفت الرجل إلى أن تجاور فيلات لا تساوي في نفس سعر الشراء أشعره وكأنه في مساكن شعبية، مضيفا: «عايز أقولكم خبر مش كويس، مش هقعد في مكان واحد مع ناس أقل مني في المستوى، سوري أنا شاري فيلا بـ 100 مليون يقعد معايا ناس بـ 100 مليون لكن يسكن معايا في نفس المكان ناس شاريين بـ 17 و40 و9 مليون أعتقد كده بقت مساكن شعبية، سوري يا جماعة».

رولين القاسم وأزمات الساحل الشمالي عبر السوشيال ميديا

وليست هذه المرة الأولى التي يعلق فيها أحد الأشخاص على أسعار الساحل الشمالي، فقد خرجت رولين القاسم موخرا في فيديو تعليقا على الزحام لحجز الفيلات، حيث قالت بطريقة ساخرة: «ايه الاستفزاز ده، أيه خبر إن 80 واحد اشترى 100 فيلا في الساحل الشمالي والفيلا بـ 100 مليون، أنا مش مصدقة نفسي، يعني أدفع مرتب سنة في فيلا واحدة».

واشتعلت مواقع التواصل الاجتماعي عقب تعليق رولين القاسم الذي بدا ساخرا بينما تعامل معه كثيرون بشيء من الجدية وانهالت عليها التعليقات التي طالبتها بالكشف عن طبيعة عملها.