بسبب حجابها.. ميار الببلاوي تستغيث بنقيب الممثلين

أثارت الفنانة ميار الببلاوي حالة من الجدل الواسع عبر مواقع التواصل الاجتماعي، باستغاثتها بالدكتور أشرف زكي، نقيب المهن التمثيلية، لقيام أحد الأشخاص بالترويج لاعتزالها الفن وتعطيل مشاركتها في الأعمال الفنية.

رسالة استغاثة من ميار الببلاوي لـ أشرف زكي

وجهت الفنانة ميار الببلاوي رسالة استغاثة للفنان أشرف زكي، نقيب المهن التمثيلية، من خلال مقطع فيديو نشرته عبر صفحتها الشخصية على موقع التواصل الاجتماعي فيسبوك، حيث قالت خلال الفيديو « بعد اذنك يادكتور، شوف لنا مين الناس اللي بتوقف حالنا؟، وإحنا أصلا حالنا موقوف يادكتور، يعني أنا جيلي كلهم بيستغيثوا على صفحاتهم، لسة شايفة بوست لكريم الحسيني وقبلها كانت هند عاكف، مينفعش، إحنا عندنا كرامة وبرستيج، إن احنا منقولش، أنا الحمد لله شغالة في الميديا كويس، وبرنامجي محقق مشاهدات وتريندات وكويس وزي الفل».

وأضافت « لكن كمان مسمحش إن لما يجيلي دور يقول لا، وبعدين داير في كل حتة يقول، إنتوا عايزين تشغلوا ميار الببلاوي إزاي وهي معتزلة؟ طب إنت بتعرف منين، طب إنت مالك، مين مسلطك عليا، مبقولش غير حسبي الله ونعم الوكيل في أي حد يقول إني اعتزلت وفي حد يوقف أكل عيشي يقطع رزقي أنا وابني».

كنت مترشحة لمسلسل كان نفسي اشتغل فيه

أوضحت الفنانة ميار الببلاوي أن هناك أحد الأشخاص تسبب في قطع رزقها من أحد المسلسلات التي كانت تتمنى أن تشارك فيه، قائلة « النهاردة عرفت إني كنت مترشحة لمسلسل من المسلسلات اللي نفسي اشتغل فيها، لإنه مسلسل حلو، وبيتكلم عن حاجة كويسة، نفسي تبقى رسالة مني للناس، مش عايزة أجيب اسم المسلسل، لكن كفاية تعرفوا إني من الناس الأبطال اللي مترشحة للمسلسل».

وعبرت ميار عن استيائها الشديد من موقف الشخص المتدخل في حياتها قائلة «الناس كانوا مرحبين وقالوا كلموا ميار الببلاوي، علشان تقولوها على الترشيح، طلع واحد معرفش ايه موقعه من الإعراب قالهم ميار الببلاوي انتوا متعرفوش ولا ايه؟، قالوا له مالها، الدور لايق عليها، ولايق على إنها لابسة الحجاب، قالهم لأ دي اعتزلت ومبتمثلش، وبعدين دي بتعمل برنامج ديني وهتقعد تقولكم قال الله وقال الرسول، أنا مش فاهمة أنا هقرفهم ليه؟، ومالي انا قولت قال الله وقال الرسول في الموضوع.

أنا أعرف أشتغل من غير ما اجي جنب حجابي وديني

واستطردت ميار الببلاوي حديثها «وبعدين دي أرزاق، إنت هتستفيد إيه، لما تقطع رزقي في حاجة؟ يعني أنا أعرف كويس اشتغل شغلي، من غير ما أجي جنب حجابي وجنب ديني، ولا أزهق الناس، يعني خلاص ادعوا إلى سبيل ربك بالحكمة والموعظة الحسنة، وبعدين تقعد تقول دي بتعمل برنامج ديني، معقولة هتمثل وهي بتعمل برنامج ديني، إنت ميخصكش بقى».
 

ميار الببلاوي تنفي اعتزالها

ونفت الفنانة ميار الببلاوي اعتزالها العمل في المجال الفني موضحة « أنا يتعرض عليا الدور، أقبله مقبلوش، لكن انت داير في كل حتة تقول، ميار الببلاوي اعتزلت، وبعدين ألاقي بيكتبوا الفنانة المعتزلة، ياجماعة معتزلتش، حرام عليكوا توقفوا حال الناس ورزق الناس، وميطلعليش حد يقولي، إنتي إيه ياميار، جرى إيه ياميار، إحنا كنا بنحترمك إنتي كنتي سبتي الفن، أنا لا سبت الفن، ولا عايزة أسيب الفن، أنا ممثلة ومذيعة وبعمل كل حاجة بما يرضي الله وفي النطاق الشرعي».

وتابعت « ضوافر مفيش ضوافر، الميكاب انا جاية من تصوير، ابعدوا عني، ابعدوا عن رزقي، ابعدوا عن اكل عيشي انا وابني، انا مش معتزلة، ومبحبش الكلمة دي على فكرة، أنا ممثلة محجبة، وأكيد القائمين على الأعمال الفنية عارفين إنهم جايبين ممثلة محجبة».

أنا داخلة على الـ 50 وعايزة أعمل أدوار الأم

ترى الفنانة ميار الببلاوي في نفسها دور الام على الشاشة وخاصة أنها تقدمت في العمر على حد تعبيرها، حيث قالت « انا واحدة داخلة على الـ 50 سنة، أكيد وأنا داخلة على الخميس أطلع دور الام، انا عندي شاب مبخبوش، أنا عايزة أعمل أدوار الأم، وهي مناسبة لحجابي، واعتقد إن أنا ممثلة مش وحشة، والمسلسلات اللي بتتعرض لي لحد دلوقتي على الفضائيات، ومسلسلاتي الاخيرة بتقول إني ممثلة كويسة، ليه انت لما ترشح لمسلسل تقول إني معتزلة، إنت جبت الكلمة دي منين؟ ».