أمه حاولت تتخلص منه.. محمود سعد يحكي قصة مثيرة عن صعود كريستيانو رونالدو

رَوَى الإعلامي محمود سعد، قصة حياة اللاعب كريستيانو رونالدو، حيث كانت صعبة في بداياتها، وشهدت محطات كثيرة مهمة يمكن الاستفادة منها.

وقال خلال بث مباشر له عبر صفحته الرسمية على فيس بوك: رونالدو كان ولد صغير أبوه سافر الحرب ورجع متدمر تقريبًا وطول النهار يسكر والأم كان عندها ولاد ومش عاوزه رونالدو خالص وحاولت تتخلص منه بالإجهاض بس مفيش فايدة، وكان ولد عنده حلم منذ صغره وعنده موهبة واهتم بيها، ولكن الأب طول النهار يشرب لدرجة أنه بيموت بالكلى من تأثير الشرب عنده 53 سنة.

وأضاف: رونالدو كان عنده رغبة أن يكون، ورأيه أنه لازم يكون هو الأفضل ولم يمس أحد من أقاربه أو أصدقائه حتى يكون كذلك، رغم وضع الأب والعائلة كان مستواها المادي متواضع جدًا، فكبر في مهنته وهو 12 سنة ساب العيلة وراح بلد تانية ونجح وكبر وبعدين فيه مسابقة لأحسن واحد في مجاله وحصل عليها وبدأ يروح المناسبة دي تاني، وهو ساحر كورة وبص لخصمه ميسي لما خد الكورة الذهبية، وحقق نتائج جبارة لأنه قرر أن خصمه يساعده وليس ضده.

وتابع: رونالدو عنده ولد منعرفش أمه مين، ورفض إعلان من هي، علاوة على أن أخاه كان مدمن ولكن عالجه وأصبح جزء من إدارة أعماله.. ورونالدو كان لا شيء ثم أصبح شيء مهم جدًا في العالم، وهو موهوب ودماغه نضيفة، لكن إحنا لما بيكون عندنا خصم بنجرحه ونشرحه ونسيء ليه، ولكن يجب النظر إلى الخصم على أنه يساعدني والتفوق على الزميل في العمل بالشغل مش بغيره.

واستطرد: ونشوف حسرته أنه مقدرش يعمل حاجة لبلده في كأس العالم، وهل إحنا بنتعلم الفكرة دي وننتبه ليها؟، فكرة أن الحياة مش عارف فيها إيه، عشان كده البدايات منقعدش جنبها ونعيط، ولازم نخلي النهايات حلوة وغير البداية وده ممكن.