عايِزنا نأكّله ونشرّبه.. تفاصيل مأساوية جديدة في مقتل عروس أكتوبر على يد جوزها
كشف والد الممرضة فاطمة ضحية زوجها بمدينة أكتوبر تفاصيل مثيرة عن تخلص زوجها منها بسبب خلافات بينهما منذ زواجهما من 5 أشهر.
وقال والد الضحية:" اللى حصل كان فيه مشاجرة بينهم وهما متجوزين من 5 شهور، وهو كان عايز يخلينا نزورهم كل أسبوع مرة وده كان سبب الخلاف بينهم بشكل مستمر، وكانت بتشتكيلي منه، ونبهنا عليه كذا مرة لكن هو مش بيرجع على اللى بيعمله".
وأضاف والد الضحية في تصريحات صحفية:" هما يوم الأحد اللى فات حضروا عندنا وفطروا، وهو دايما بيطالبها أنه احنا نجيبلها زيارات ومواسم كل أسبوع علشان تاكل وتشرب منها هو وهى، وده خارج عن قدرتنا المادية وانا أرزقي على باب الله، وبطالب بأقصى العقوبة له".
أقوال والدة المجني عليها
وقالت والدة المجني عليها:" حق بنتي ميروحش بنتي مدمرة وهو مدمرها، وانا علشان مروحتش ليها في رمضان أزورها وأجيبلها مواسم هو عمل فيها كده وحسبي الله ونعم الوكيل فيه واللى عمله في بنتي يتعمل فيه، واحنا روحنالها مرتين بعد الجواز واحنا ارزقيه وده بالنسبالنا سفر بينا وبينها، وانا عايزة القصاص وعدل ربنا ويشنقوه في ميدان عام واللى عمله في بنتي واشوفه فيه".
واختتمت الأم المكلومة:" هو عذبها ومولع فيها ومحروقة في جسمها كله ومشوها وعايزه عدل ربنا فيه".
النيابة تباشر التحقيقات
وتباشر النيابة العامة بجنوب الجيزة، تحقيقاتها حول واقعة العثور علي جثة ربة منزل مقتولة داخل شقتها بحدائق أكتوبر، وأمرت النيابة بتشريح الجثة وطالبت تقرير طبي بالإصابات التي لحقت بها وأدت لوفاتها، كما صرحت بدفن الجثة.
وطلبت النيابة تحريات الأجهزة الأمنية حول الواقعة لكشف ملابساتها وتحديد هوية مرتكبي الحادث، والتحفظ علي كاميرات المراقبة الكائنة بالقرب من موقع الحادث وتفريغها، وكذلك فحص علاقة المجني عليها بمن حولها
وكانت قد تمكنت الأجهزة الأمنية بمديرية أمن الجيزة من القبض على المتهم بقتل زوجته طعنًا بالسكين في أكتوبر.
كان بلاغ ورد لضباط مباحث حدائق أكتوبر من غرفة النجدة بالعثور على جثة سيدة داخل شقتها، على الفور انتقل رجال المباحث لمكان الحادث، وبالفحص تبين وجود جثة ربة منزل تدعى فاطمه.س.م، وبالفحص تبين إصابتها بطعنة نافذة أودت بحياتها.
وبعمل التحريات تبين أن زوج المجنى عليها وراء ارتكاب الواقعة، تمكنت القوات من ضبط المتهم، وتحرر المحضر اللازم، وتولت النيابة التحقيقات.
