مؤشر على أخطر الأمراض.. طبيب شهير يوضح أرخص وأهم تحليل | فيديو
نصح الدكتور حسام موافي، أستاذ طب الحالات الحرجة في مستشفى القصر العيني في لقاء تلفزيوني، عن نوع واحد من التحاليل، هو أرخص نوع وأهم نوع يجب على كل شخص مريض أو سليم أن يقوم به كل فترة.
وقال موافي عن أهمية التحاليل بشكل عام: «لازم حتى لو شخص سليم يعمل فحص شامل كل 6 أشهر، دلوقتي التحليل والدواء غالي عشان كدة الناس بتكسل».
وأضاف: «لكن المطلوب عشان نحافظ على الصحة العامة، نعمل تحليل جميل جدًا ورخيص وسريع، وهيريحني جدًا وهو تحليل سرعة الترسيب».
ما هى سرعة الترسيب؟
وصف موافي سرعة الترسيب بأنها: «سرعة الترسيب الناس كلها فاهمه غلط، الناس بتيجي تقول ترسيبي عالى وده غلط، ومثال عن سرعة الترسيب لما أقف على حافة الترعة وأهز المياه تتعكر المياه عكرة وأسيبها ساعتين الاقي الطين نزل، الدم كدة زى الطين بالظبط».
وأكمل: «لما أحط دم في أنبوبة وأشوف أول ساعة نزل كام مل وتاني ساعة كذلك تبقى سرعة الترسيب أول ساعة كذا وتاني ساعة كذا».
وعن سبب انخفاض سرعة الترسيب قال موافي: «ايه اللي يخلي سرعة الترسيب تنزل وايه اللي يخليها ماتنزلش، لما بينزل بيبقى ابيض ولو مانزلش بيبقى أحمر، في أولى إعدادي قالك ازاى تروق المياه يقولك تحط عليها شابة تعمل زى الجيلاتين فتأخذ الطينة وتنزل».
وأضاف: «كذلك البروتينات في الدم بتاخد الخلايا الحمراء وتنزل وكل ما البروتينات زادت وعليت هتاخد الدم أسرع وتنزل وسرعة الترسيب يزيد ودي مش مطلوبة».
وأكد موافي: «جميع مرضى الأنيميا سرعة الترسيب عندهم عالية، وسرعة الترسيب بتبقى مؤشر أن فيه مرض وهى دي فائدتها فقط».
وذكر موافي 3 أمراض تتسبب في ارتفاع سرعة الترسيب، وهم:
-السل.
-كافة أنواع السرطان أيًا كان مكانها.
-الحمى الروماتيزمية عند الأطفال.
