بيسرق هدوم الستات ويديهاني هدية..عفاف تطلب الخلع في محكمة الأسرة

عفاف زوجة ثلاثينية متوسطة القوام وقفت أمام محكمة الاسرة بالكيت كات، طالبة الخلع من زوجها على مشكلات بينهما بسبب قيامه بسرقة ملابس السيدات وإعطائها اليها كهدية لها، وإخبارها بأنها ملابس قادمة من الخارج.

زوجة تطلب الخلع من زوجها

سردت عفاف مشكلتها مع زوجها التي جعلتها تقيم دعوى خلع للتخلص منه قائلة «كان على طول يجيب لي ملابس نسائية هدية ويقولي أنا بجيبها من محل واحد صاحبي، وفي الأخر أكتشفت المصيبة اللي أنا عايشة فيها، والحمد لله أن ربنا كشفه قدامي عشان أنا صافية».

وقالت عفاف في قصتها «أنا عندي 32 سنة، وجوزي قدي في العمر بإختلاف شهور بسيطة، وأتجوزت من سنتين، والحمد لله ربنا مرزقنيش بأطفال منه، عشان مش عارفة لو كان عندي أطفال كنت هقولهم إيه بعد كدة، وهو أتقدم لأهلي وقال أنه بيشتغل فني ألوميتال وعنده محل، وأنا وافقت على الجواز منه وأنا كنت مجهزة كل حاجتي لأني بشتغل من وأنا عندي 21 سنة، وهو كان جاهز بردو، وأتجوزنا في 60 يوما بس».

عفاف تطلب الخلع: بيسرق هدوم 

وتابعت عفاف قائلة «بعد الخطوبة نزلنا أتفقنا على العفش والأجهزة واستلمنا الخشب والفرح كان بعد شهرين خطوبة، وبعد الجواز بحوالي 3 شهور لقيته جاي وجيابلي هدوم بيت حريمي، وقالي دي هدية ليكي، وأنا إستغربت وقولتله إزاي دخلت محل حريمي كدة، قالي لا ده واحد صاحبي بيجيب الهدوم دي وأنا أخدتها منه، وحسيت أن الهدوم كأنها مستعملة قولتله هي الهدوم تحسها مستعملة قالي ما هي جاية من بره بالة».

وأضافت عفاف في مأساتها مع زوجها «تصرفات جوزي مكنتش غير طبيعية أو أن حد يشك في أي حاجة، وموضوع هدايا الملابس ده أتكرر 5 مرات، وفي مرة قولتله طيب ما تاخدني معاك عشان أختار، قالي دي هدية إزاي يعني، ومن حوالي 4 شهور كنت راجعة البيت لقيت واحدة ست قابلتني وقالتلي أنا عارفة أنك ساكنة هنا، أنا صورت جوزك وهو بيسرق هدوم من على الحبال، وعرفيها يبطل السرقة عشان ما أبلغش عنه وأنا قولت أقولك لأنك في حالك ومش حمل مرمطة».

وأختتمت عفاف قائلة «الست ورتني الصور ومرديتش تديني صورة واحدة منها، ولما رجع قولتله على كل اللي حصل وفضل يحلف أنها كدابة وأنه واحد شبهه وأن لو في صور طيب هي فين، وسبت له البيت وروحت عند أهلي وطلبت أنه يطلقني موافقش روحت رفعت قضية خلع عليه»