شكلي جامد..تعليق مفاجيء من أسما شريف منير بعد حلاقة شعرها
أوضحت أسما شريف منير السبب الحقيقي وراء قص شعرها بالكامل ونشرت بوست من كواليس تواجدها بفعاليات حفل توزيع جوائز مهرجان القاهرة للدراما والذي أقيم مساء الخميس بمدينة العلمين الجديدة.
وأوضحت "أسما" قائلة: "طيب أول حاجة شكرًا على كل ردود الفعل، الوحشة والحلوة كلها، ساعات موقف زي ده بتخلي ناس تشوف ناس تانية عاملين ازاي مجرد انهم بيعبروا عن رأيهم، وشكرًا لكل الناس اللي كانت خايفة وقلقانة عليا، ممكن بقي أقولكم الحكاية من وجهة نظري ببساطة".
واستكملت: "أولًا الحكاية جت بالصدفة جدًا وكان قرار لحظي وانفعالي جدًا ومش ندمانة عليه، تاني حاجة انا مش بعمل كده عشان أطلع ترند بس كنت عارفة هبقى ترند، في فرق كبير بين عايزه وعارفة، على فكرة الترند ده نقمة مش حاجة حلوة خالص بس مش هدخل في الجدل ده دلوقتي".
مضيفة: "تالت حاجة أنا الحمد لله كويسة ومبسوطة ومش واخدة الخطوة دي بسبب اكتئاب خالص بالعكس دي صفحة جديدة حلوة مليانة تفاؤل وقوة وإرادة وتحدي وجرأة وشجاعة وكل حاجة إيجابية في الكون، أنا فعلًا من فترة كنت بمر بمرحلة صعبة جدًا بس كنت في رحلة بقالي شوية بتعافى منها وبقف على رجلي من الأول وكان آخرها رحلة دهب".
وأنهت تعليقها قائلة: "ف تاني بالعكس ده مش اكتئاب دي مرحلة انتقالية مؤمنة إني هحقق فيها حاجات كتير، أخر حاجة الجماعة اللي مكبرين الموضوع ده شعري مش شعرك، حاجة كده بجد أخير أنا عاجبني شكلي جدًا بصراحة، شكله جامد ومديني ثقة في نفسي جدًا، بحبكم أوي بجد".
وحلقت أسماء شعرها في مقطع فيديو عبر انستجرام، قائلة: "شعرى بقاله فترة بيقع جامد، ده غير ان من كتر العمايل اتحرق، وبقي مش صحي خالص، وقررت أنفذ قرار كان بقالي كتير اوي نفسي أخده، أبدأ من جديد، وأحرر نفسي، وافتح صفحة جديدة حقيقي هو قرار صعب جدًا بس حسسني بقوة وتفاؤل".
وتابعت: "رميت ورايا حاجات كتيرة أوي بمجرد إني شلت شعري، قلبي كان بيدق جدا وبعديها حسيت إني مليانا أدرينالين.. خطوة جريئة ومرعبة بس حاسة إني طالعة منها بدرس".
وأضافت: "عارفة إن فيه ناس كتير هتهاجمني بس أنا فارق معايا احساسي بالراحة اللي أنا حساها دلوقتي.. عادي هيطول تاني بس الاحساس ده مش هحسه غير مرة.. بكره هتشوفوا النتيجة الأخيرة".
