عاتبته على تأخره فى العمل فأنهى حياتها بطعنة في القلب.. القصة الكاملة لمقتل عروس الغربية على يد زوجها
«أنا معرفتش إن بنتى اتقتلت إلا لما اتصلوا عليا تانى يوم وقالوا لى تعالى خد جثتها» بهذه الكلمات وصف محمد عبدالسلام والد «روان»، ضحية زوجها فى المحلة الكبرى كيفية تلقيه خبر مقتلها على يد الزوج.
وقال الأب باكيا: «أنا عايش فى محافظة الدقهلية وبنتى (روان) عايشة مع جوزها فى المحلة الكبرى وكانت فى علاقة حب كبيرة بينها وبين زوجها أحمد فى فترة الدراسة بكلية التربية الرياضية واستمرت طوال مدة الدراسة ومكنتش أعرف الكلام ده إلا لما أحمد اتقدم لها وهى كانت فرحانة أوى وتزوجوا من سنة ونص وعندهم طفل دلوقتى عمره 3 شهور».
وأضاف الأب وهو فى حالة صدمة: «أنا معرفتش أن بنتى اتقتلت إلا تانى يوم بعد ما جالى تليفون من مركز قسم تانى المحلة وقالوا لى تعالى لبنتك فى مستشفى المحلة علشان هى تعبانة شوية واتفاجئت بتليفون آخر من المركز بيقول لى بنتك ماتت وزوجها قتلها وتعالى علشان تستلم جثتها».
وانهار الأب وهو يقول: «بنتى اتقتلت فى نفس التاريخ اللى اتعرفت فيه على أحمد لأن هما اتعرفوا على بعض يوم 3 ديسمبر2019 وكانت بتحب تحتفل باليوم ده، لكن للأسف اتقتلت فى نفس اليوم يوم 3 ديسمبر 2023».
واستطرد الأب وهو فى حالة ذهول: «عرفت من شقيق روان إن كان فى خلافات بينها وبين زوجها أحمد من اسبوع بسبب تكرار تأخير الزوج عن ميعاد عودته من العمل اللى اتعود عليه ويوم الوفاة حدث بينهما مشادة فى محل عمله وبعدها أخدها زوجها هى والطفل إلى المنزل وأصرعلى إنه يسيب ابنه الرضيع عند والدته وأخدها وطلعوا البيت مع بعض ودار شجار بينهما وتطاول عليها بالضرب، وتطورت المشاجرة وبعدها أحضر سكينًا وطعنها فى القلب مما أدى إلى وفاتها فى الحال».
وتابع قائلا: «بعد ما قتلها الظالم اتصل بصديق له وقاله انا قتلت مراتى فاتصل صديقه على الشرطة ولما راحوا لقوا بنتى مرمية على الأرض وتمكنت الشرطة من القبض عليه واعترف إن هو اللى خلص عليها».
وبكى وهو يقول: «أنا مش عايز غير حق بنتى الغلبانة هو لو كان مش عايزها كان بعتها لينا ولا قالى تعالى خد بنتك مش يقولوا لى تعالى خد جثتها، أنا عايز حق بنتى وواثق فى ربنا وقضاء مصر».
كانت الأجهزة الأمنية بمحافظة الغربية تلقت بلاغًَا بمقتل ربة منزل على يد زوجها بمسكنهم بمنشية البكرى بالمحلة الكبرى فى محافظة الغربية، وانتقلت مباحث قسم ثانى المحلة إلى مكان الحادث حيث تبين مقتل «روان محمد عبدالسلام»، 22 سنة، من مواليد مركز بلقاس بمحافظة الدقهلية، على يد زوجها «أحمد. ع. ع»، 27 سنة، ولديه محل مفروشات.
