لم أغامر بكم.. السيسي يكشف سبب تحرير سعر الصرف في هذا التوقيت

كشف الرئيس عبد الفتاح السيسي، رئيس الجمهورية، سبب اتخاذ قرار تحرير سعر الصرف في الفترة الحالية على وجه التحديد.
وقال الرئيس، خلال الندوة التثقيفية للقوات المسلحة، اليوم السبت: معانا بين 45 و50 مليار دولار، من مشروع رأس الحكمة واتفاق صندوق النقد الدولي والاتحاد الأوروبي وأمور أخرى، لما يبقى معايا الرقم ده وأقدر أعمل سعر مرن للصرف طبقا للطلب، يبقى أنا ممكن أنجح.
وأضاف الرئيس السيسي: لكن غير كده كان هيبقى في مشكلة كبيرة جدا في مصر، هل أنا عاتبت رجال أعمال وناس في مصر على الدولار والمراهنة عليه، أنا عاتبت حد؟، عاتبت ناس جابت البضائع وسعرت الدولار على 70 و80 جنيه؟، عملت إجراء حاد ضد حد؟.
وتابع: ممكن حد يقولي معملتش إجراء ليه!، يعني نبقى في أزمة كبيرة زي دي ونعمل إجراءات تعقد الأمر أكثر من اللازم ولا نحاول نحل المسألة ونتعب كلنا شوية.
وواصل: اوعى حد يزعل من الكلمة دي، أوعوا تدوا ضهركم لبلدكم، الكلام ده ليكم كلكم، الكلام اللي هقوله غريب أوي، هما يومين كلنا هنقعدهم على وش الدنيا ونمشي، لو جمعت فلوسك من الحلال هتنفعك ولو من حاجة تانية هتبقى نار عليك، إذا كانت بتؤمن إن في حساب والكون ده ليه صاحب جابنا وبيختبرنا.
واضاف الرئيس: الناس متكلمتش في حرمانية أي سلوك من السلوكيات دي، مع الوضع في الاعتبار أن الأمور في الدول بتكون بالأنظمة والقوانين، لكن حتى النقطة دي غايبة عن البعض ومش عارفين إيه الحلال والحرام اللي بيعملوه.
وقال الرئيس عبد الفتاح السيسي، إن الأوضاع الاقتصادية بدأت في التحسن، مؤكدا: الأمور بدأت في التحسن وأقول ذلك حتى أسجل موقفي لكم جميعا.. أنا لم أغامر بكم، ولم أتخذ قرارا أضيّع به مصر، ولا الحكومة.
وأضاف الرئيس: نحن لم نغامر، ولم يكن هناك فهمًا خاطئًا أو منقوصًا، اتخذنا به قرارا يضيّع مصر.
وواصل: نحن لم نكن فاسدين وأخذنا أموالكم وضيعناها بفساد، فهذا لم يحدث.
وشدد الرئيس عبد الفتاح السيسي، على أن ما تم من إنجازات على أرض مصر يستطيع أي أحد رؤيته.