منحرف وبيحب الرجالة.. بائع رمسيس أنهي حياة الضحية وسرق أمواله

أحال  المحامي العام الأول لنيابة شمال القاهرة الكلية عاملًا من الصعيد إلى محكمة الجنايات لاتهامه بقتـ.ـل عجوز يبلغ من العمر 60 عامًا، لديه ميول مثلية ( شـ. ـاذ)، واستمعت النيابة إلى أقوال المتهم في القضية. 
نص أقوال المتهم
س: ما ظروف نشأتك الاجتماعية؟
ج: انا من مواليد مركز ساقلته بسوهاج وأبويا راجل شغال في السعودية بيشتغل سواق في شركة معدات ثقيلة وامي ربة منزل وعندي اخ اصغر مني في تانية اعدادي وليا أربعة بنات متجوزين وواحدة مخطوبة
س: ما غاية مؤهلاتك الدراسية؟
ج / انا خلصت اعدادية في سوهاج وبعد كده سبت المدرسة.
ص ما حالتك الاجتماعية؟
ج انا متجوز من بنت عمي اسمها رانيا رمضان من شهر يناير عام ۲۰۲۰ ومعايا طفلين وعد ودي عندها سنة ونص وحمزة عنده ست شهور وهما عايشين مع امهم في بيت العيلة في سوهاج 
س: ما مصدر رزقك؟
ج: انا بيخشلي من شغلانة البائع المتجول حوالي ٤٠٠٠ جنيه.
س: كيف يجرى انفاقك لذلك المبلغ ؟
ج: انا عليا التزامات كل شهر قسط قرضين الاول قيمته ۱۵۰۰۰ جنيه بدفعله كل شهر ١٥۰۰ جنيه لمدة ١٦ شهر وده أخذته عشان يبقى معايا فلوس واعمل فرشة الهدوم اللي بيبع فيها والقرض التاني قيمته ١٥۰۰۰ جنيه بدفعله كل شهر ۱۱۰۰ جنيه لمدة ۱۸ شهر وده خته لما مراتي كانت بتولد حمزه والاتنين خدتهم من شركة اسمها تمويلي وبدفع
٥٠٠ جنيه ايجار اوضة اللي انا مقيم فيها وببعت لمراتي ٥٠٠ جنيه وبيفضلي حوالي ٥٠٠ جنيه بصرفهم.
س: ما علاقتك بالمجني عليه علاء الدين حلمي يوسف ابراهيم؟
ج: انا اتعرفت عليه في رمسيس من حوالي ٣ شهور.
س: وما الذي تعرفه عنه؟
ج: انا اعرف عنه انه كبير في السن وعنده حوالي ٦٠ سنة وبيقعد في رمسيس دايمًا وانه شاذ جنسيًا وانه عايش مع اخته واخوه المعاق ذهنيًا وقابلته حوالي ٣ مرات.
س: وكيف جرى لقائك الأول به؟
ج انا قابلته صدفة في رمسيس وانا شغال ببيع هدوم وهو ساعتها قالي انه عايز يقعد معايا وانا فكرته راجل كبير معندوش حد يسال عليه وقولتله مفيش مشكلة وخدنا ارقام بعض وفجأة لاقيته حط ايده عند موضع حساس وانا قولتله عيب اللي انت بتعمله ده وهو قالي لا مش عيب انا عايزك تيجي معايا البيت وعرفت انه شاذ وسيبته ومشيت  وساعتها قررت أن الراجل ده انا هجزه من على وش الدنيا وهموته واخد أي حاجة معاه عشان ابيعها واعمل مصلحة.
س: وما تفاصيل مخططك قبله؟
ج: انا فكرت وقررت اني هسايره في اللى هو عاوزه وهفهمه اني هنام معاه عشان يطمنلي ويخليني اروحله بيته ولما اروح هموته وأخد اللي موجود في البيت وابيعه واعمل منه مصلحة.
س: وكيف جرى تحضيرك لتنفيذ ذلك المخطط؟
ج انا فضلت اسايره في اللي في دماغه وقعدنا الـ ٣ شهور دول بنتكلم في التليفون وبنبعت لبعض رسائل على الواتساب وعلى الفيس بوك وكان مضمون الكلام جنــ.سي عشان اسخنه عشان يخليني اروحله البيت وأنفذ وقررت اني لما اروحله أخد معايا بنطلون برمودا الاستيك بتاعه عبارة عن حبل وخنقه بيه ومش هستخدم سلاح عشان ميبقاش في دم وعشان هو ميطلعش صوت لما اغزه بالسلاح وهاخذ معايا كيس ألم فيه الحاجة اللي هلاقيها في البيت.
س وما الذي دار بينكما عقب ذلك؟
ج: ابتديت اعشمه اكتر اني هنام معاه وابعتله رسائل جنسـ.ـية وكل ما نبعت لبعض هو يسخن وانا اسخن على قتلـ.ـه لحد يوم الاثنين الموافق ۲۰۲۳/۷/۱۰ اتكلمنا واتفقنا اننا نتقابل تاني يوم عشان هو هيكون لوحده في البيت وفعلًا قابلته تاني يوم ونفذت.
س: وكيف جرى تنفيذك؟
ج: انا رحت البيت عنده في شارع كلوت بك حوالي الساعة ٣ العصر وطلعتله فتحلي الباب وقالي انا مستنيك من بدري ودخلت الشقة وانا ساعتها كان معايا شنطة هدومي فيها بنطلون برمودا وقميص وحزام وصندل وقعدت في الصالة وهو ساعتها كان لابس قميص وفاتحه الزراير بتاعته وبنطلون برمودا وقولته انا هخش اغير هدومي ودخلت
الحمام وغيرت البنطلون الجينز بتاعي ولبست البنطلون البرمودا وقعدت في الصالة وهو فضل يتكلم معايا في الأمور الجنسية ويقرب مني ويقولي انا عاوز ابوسك واتجوزك واحضنك ونفسي أكون زي مراتك وتقعد معايا على طول وراح حط ايده ويقرب مني وقعد على رجلي وقلع القميص اللي كان لابسه وساعتها وهو قاعد على رجلى
لمحت حتة حديدة شبه السكينة على ترابيزة جنبنا رحت مسكها بإيدى وغزيته بيها في رقبته وفضلت حاططها جوة رقبته وهو حاول يزق ايدى عشان يخرج الحديدة من رقبته بس معرفش ووقعنا على الأرض وفضلنا نعافر مع بعض انا وهو لغاية ما وصلنا للطرقة وضربته بترابيزة خشب مذهب كذا ضربة على دماغه وهو ابتدى يصرخ ويقول الحقوني وانا كنت ماسكه بايد وبالأيد التانية فكيت الحبل بتاع البنطلون البرمودا اللي انا كنت لابسه ولفيته على رقبته
ومسكت الحبل بايدى الاتنين وفضلت اخنقه لحد ما قطع النفس ومبقاش بيتحرك وعرفت انه مات ودورت في الشقة
على الحاجات الخفيفة اللي اعرف اخدها وانا نازل لغاية لما لاقيت التليفون بتاعه في أوضة نومه وجنبيه ٤ تليفونات خدتهم كلهم ولاقيت شاشة تلفزيون جديدة بكيسها صغيرة ختها وسماعة أغاني ختها وخمس شواحن ونظارتين و٣ ساعات جديدة بعلبهم ختهم وبعد كده دخلت الحمام وغلست ايدى ووشي من الدم وغيرت هدومي اللي اتبهدلت من الدم وحطتها في الكيس بتاعي وخدت الحاجات اللى قولت عليها من الشقة ونزلت.