منهم عبد الظاهر السقا.. شقيق أحمد رفعت يكشف المذنب والبريء في قضية اللاعب

رد محمد رفعت، شقيق اللاعب الراحل أحمد رفعت، على التصريحات التي أدلى بها محمد رشوان، محامي اللاعب، بعدما أقحم عبدالظاهر السقا في الأزمة الخاصة بسفر نجم مودرن سبورت السابق إلى الإمارات، للإعارة في فريق الوحدة.
وقال محمد رفعت، في تصريحات عبر برنامج «الكورة مع فايق»: «كابتن عبدالظاهر السقا ملوش ذنب في أي حاجة، والاسم الثاني محدش يعرفه إلا أحمد- الله يرحمه -».
رد شقيق أحمد رفعت بعد تصريحات عبدالظاهر السقا
وأضاف: «بقالنا من وقت وفاة أحمد احنا عايشين في ضغط عصبي بسبب اللي بيحصل على السوشيال ميديا، أنا كنت ذكرت اسم هو تسبب في أذى نفسي لأحمد وإديت مثال، للي كان أخويا عايز يقوله لما طلع معاك».
وأكمل: «لكن مقولتش أكثر من كدة، أنا بشكر التحقيقات والدولة وبيحققوا في الموضوع، ووزارة الشباب والرياضة، احنا مش مستنيين حاجة من حد».
وتابع: «مفيش حاجة هتحصل هتعوض فراق أخويا عني وعن أمي وأخويا الثاني، الفكرة كلها إننا مش عايزين الموضوع ده يحصل مع حد تاني يتظلم يحصل له أذى، ده عمره وقضاء وقدر، وكان ممتن جدًا للمؤسسة العسكرية، أكثر مكان ساعده في الفترة دي كانوا بيساعدوه جدًا عشان يشيلوه من اللي هو فيه».
وأكمل: «هيثم عرابي ده أخونا شخص من بعد محنة أحمد رفعت لحد النهاردة الراجل عندنا كل يوم في البيت. أحمد كان محترم لأبعد الحدود وكنت بقول عليه مثالي، لما في حد بيأذيه كان بيبعد عنه».
وتابع: «أنا شايف إن هيثم عرابي شخص مطحون على السوشيال ميديا، الشخص الثاني أحمد بس اللي يعرفه ولا حد يعرفه. أحمد في شخص أذاه عن طريق تأخير وصول أوراق معينة له، إنه لما يرجع بلده يشتغل شغله العادي والأمور الطبيعية».
وأتم: «أنا تعبت وأمي وأخويا الصغير، احنا المفروض نقعد ناخد عزاء أخويا، أنا يوميًا في 500 مكالمة بتجيلي، احنا عايزين نعيش في سلام واللي بعد كدة ومحدش يتأذي، وميحصلوش مشكلة. احنا مستنيين التحقيقات اللي تظهر مين الغلط ومين الصح».