تفاصيل مثيرة عن أغرب حوار بين قاضٍ وزوجة سبعينية تطلب الخلع أمام محكمة الأسرة
لا تزال محكمة الأسرة مليئة بالدعاوى والنزاعات الزوجية الغريبة والمثيرة والطريفة أحيانًا. تنتهي هذه النزاعات نهايات مختلفة ربما لصالح الزوجات أو الأزواج، لكنها تبقى أمام محكمة الأسرة «دعوى قضائية» تنظرها المحكمة وتتداولها وتصدر فيها حكمًا لصاحب الحق، ومن يتمكن من إثبات إدعائه.
دعوى خلع أقامتها زوجة في أوائل السبيعنات من عمرها ضد زوجها الذي اقترب من الثمانين عامًا، لم يكن عمر الزوجين هو فقط الغريب في تفاصيل تلك الدعوى، ولكن الأغرب كان في الحوار الذي دار بين القاضي، رئيس محكمة الأسرة، الذي ينظر الدعوى وبين الزوجة مقيمتها، وننشره في السطور القادمة، حتى انتهى الحوار وإنتهت جلسة محكمة الأسرة بحجز القضية للحكم منتصف شهر أكتوبر المقبل.
القاضي: إتفضلي يا حاجة.. إنتي عاوزة تخلعي جوزك؟
الزوجة: أيوه يا باشا
القاضي: ليه يا حاجة، إنتي عندك 72 سنة وجوزك المدعي عليه عنده 77 سنة، عاوزه تخلعيه ليه بعد العمر ده كله، إنتو متجوزين من أكثر من 45 سنة؟
الزوجة: يا باشا أنا زهقت ومش قادرة أعيش معاه
القاضي: زهقتي بعد السنين دي كلها يا حاجة، ده إنتو أجداد وعندكو أحفاد ماشاء الله، يعني استحملتيه كل السنين دي، ودلوقتي زهقتي؟!
الزوجة: ما هو لو بعد السنين دي كلها ما صانش العشرة وبيقل أدبه عليا، ويهيني قدام ولادي وأحفادي، يبقي مالهاش لازمة العيشة.
القاضي: بس إنتو دلوقتي يا حاجة مالكوش غير بعض، ومحتاجين بعض حتى من بابا الونس، مش أحسن ما كل واحد يعيش لوحده في السن ده، أهو تعيشوا مع بعض تونسوا بعض.
الزوجة: ونس إيه يا باشا وهو في السن ده بيمد إيده عليا، ده عمره ما عملها وإحنا لسه بصحتنا في أول عشرتنا، هستحمل دلوقتي وأنا فوق السبعين إنه يشتمني وكمان يضربني؟!
القاضي: هو بيضربك يا حاجة؟
الزوجة: ضربني أكتر من مرة يا باشا، ومنها مرات قدام ولادنا وأحفادنا، ده غير الإهانة والشتيمة المستمرة قدامهم ومن وراهم. عشان كده بقول لحضرتك أنا زهقت ومش قادرة أكمل عيشة معاه.
القاضي: عندك شهود يا حاجة على إنه ضربك وأهانك؟
الزوجة: ولادي نفسهم وولادهم ممكن ييجو يا باشا ويحلفوا ويشهدوا إنه ضربني قدامهم، بس أنا مش عاوزة أجيبهم محاكم وأبهدلهم دول كلهم متعلمين وبيشتغلوا وكويسين.
القاضي: طيب ليه ما إتكلموش مع والدهم في المشكلة وحاولوا يصلحوا بينكم بدل القضايا والمحاكم؟
الزوجة: إتكلموا كتير يا باشا والله، حتى لما يأسوا ولقوا مفيش حاجة بتتغير قالوله خلاص طلقها بالتراضي هي مش عايزة تعيش معاك خلاص، شتمهم وطردهم وقالهم مش هطلقها.
القاضي: عشان كده رفعتي قضية خلع؟
الزوجة: أه يا باشا، ومش عاوزة منه أي حاجة أنا متنازلة عن كل حقوقي.
القاضي: يعني خلاص يا حاجة إنتي مصرة على الخلع؟
الزوجة: أه يا يا سيادة القاضي
القاضي: قررت المحكمة حجز الدعوى للحكم بجلسة دور أكتوبر المقبل، ثم رفعت الجلسة.
