قتلتي أبونا وعايزانا نصرف عليكي ؟.. حكاية أم وأبنائها في دعوي نفقة أمام محكمة الأسرة

أقامت سيدة مسنة دعوي نفقة أمام محكمة الأسرة بالجيزة تطلب فيها إلزام أبنائها الثلاثة بدفع نفقة شهرية لها تتضمن نفقة مسكن ومأكل ومشرب ومصروفات علاج.
روت مقيمة الدعوي أمام خبراء مكتب تسوية النزاعات الأسرية بمحكمة الأسرة تفاصيل دعواها، وقالت: «اللي هتسمعوه مني عمركو ما هتسمعوه في حياتكو عشان ده أسوأ صور جحود الأبناء لأبائهم، وولادي التلاتة أقل حاجة أوصفهم بيه إنهم جاحدين وعاقين مايعرفوش يعني إيه رحمة».
وأضافت الأم العجوز أمام خبراء محكمة الأسرة: ولادي بعد ما ربتهم وكبرتهم وكل واحد فيهم بقي بيشتغل ودخله معيشه زي الفل مستخسرين يصرفوا عليا أكل وشرب وعلاج، ولأني معنديش أي مصدر دخل ولا حتي معاش، مابقتش عارفة أعيش وساعات مابلاقيش أكل ولا بلاقي فلوس أجيب العلاج.
وتحكي السيدة العجوز -68 سنة- تفاصيل دعواها أمام محكمة الأسرة: جوزي أبوأولادي توفي من حوالي سنة ونص، وكنت على خلافات مستمرة معاه، كان في أواخر أيامه شبه سايب البيت وبيقعد شوية عن كل واحد من ولادنا التلاتة، وكان دايما بيتهمني إني أنا السبب في المشاكل بينا، وإن طبعي الوحش مابقاش قادر يتحمله، وقبل وفاته بحوالي 7 شهور جاله فشل كلوي ووقتها إتهمني هو وولادي إني السبب في مرضه، وإني كنت بفتعل خلافات ومشاكل هي اللي دهورت حالته الصحية وأصابت بالمرض.
بدأت مقيمة الدعوي تبكي وتقول لأعضاء مكتب تسوية النزاعات بمحكمة الأسرة بالجيزة: بعد وفاة زوجي ولادي قاطعوني ووقالولي إنتي السبب في موت أبونا، ومحدش فيهم بقي بيسأل عليا ولا بيطل عليا، وأنا ماكنش عندي أي مصدر دخل أعيش أو أصرف منه غير إخواتي اللي كانوا بيساعدني من وقت للتاني. لكن أنا خلاص مابقتش قادرة أحملهم مصاريفي أكتر من كده وولادي اللي مني سايبني رغم إنهم مقتدرين.
وإختتمت مقيمة الدعوي حكايتها أمام محكمة الأسرة بالجيزة قائلة: أنا جيت المحكمة لأني ما كلمتهم وطلبت منهم يراعوني ويصرفوا عليا رفضوا وقالولي روحي لإخواتك اللي كانوا بيقووكي على أبونا وبيشجعوكي على اللي بتعمليه لحد ما تسببتي في موته وقتلتيه من كتر المرض والزعل «إنتي مالكيش عندنا حاجة».. مالقتش قدامي غير إني أرفع عليهم قضية نفقة في المحكمة لأن ده أبسط حقوقي عليهم بعد ما تعبت معاهم سنين وإلا أموت من الجوع ومش هقدر أعيش.