«أي كلمة بتضايقني بحولها لطاقة نجاح».. تامر حسني يوجه رسالة للشباب | شاهد
وجه النجم تامر حسني لجمهوره الشباب، رسالة دعم وكشف لهم عن سبب استمراره في تأليف وتلحين أغانيه.
وكتب عبر حسابه بموقع «إنستجرام»: «زمان وأنا ببدأ حياتي مكنتش ناوي إني أصمم أكتب أغانيا وألحنها عملت أول لحن في حياتي لأغنيه إسمها راحت حبيبتي في ألبوم تامر وشيرين وإنتوا عارفين الألبوم ده إزاي نجح وكل أغانيه نجحت وكانت الأغنيه كلمات الشاعر الكبير بهاء الدين محمد طلع صحفي ينتقدني وكتب هو أنت لحقت تنجح عشان تلحن … فسألت نفسي هو كتب كده ليه مع إن الأغنيه من أنجح أغاني الألبوم وأكتر اغنيه ساعتها أثرت في الشباب،، فسألت هو مين الصحفي ده طلع صاحب مطرب معين فعرفت إنه يمكن يكون غيران شويه وخلاص».
وأضاف: «بعد شويه نزلت أغنية عيونه دار وكسبت مسابقه كبيره جدًا في مصر ساعتها على نجوم اف إم وأخدت لقب أغنية القرن فطلع نفس الصحفي كتب إنت مصمم تلحن ليه تخيلوا أغنيه حاصله على لقب جميل زي ده وبتتحارب !!! من هنا خدني الحماس أدور جوه نفسي وأركز جامد إني أغيظه،و بعد كده بقى مشروع حياتي الشمول.. ومش بس ألحن لاء أنا هلحن وهكتب أغانيا،و فعلًا من قلبي بشكر الصحفي والمطرب اللي خلاه يكتب كده لآن لولاهم مكنتش عملت الأغاني اللي هذكرها دي ومكنتش هبقى في مكانتي دي وياريت تركزوا إنهم كلهم كلامي ولحني عشان في ناس كتير متعرفش».
وتابع: «نور عيني.. كل مره.. لما بتكون بعيد.. أنا مش عارف اتغير.. يا بنت الايه.. قسمه ونصيب.. هي دي.. أنا ولا عارف.. يا تاعبني.. ضحكتها مبتهزرش، طبعًا لسه في أغاني كتير بس دول اللي حضروا في ذهني، دلوقتي وفي بعض الأغاني اللي لحني بس أو كلامي بس زي ورد صناعي كلامي.. بطلة العالم في النكد.. كلامي يامالي عيني كلامي.. لسه بحبك لحني.. قلبي اللي حبك كلامي.. وفي كتير غيرهم بس كفايا عليكم كده».
وأكمل: «و لما لحنت وألفت لغيري كانوا أغنيتين، قوم اقف وانت بتكلمني لبهاء وبص بقى لشيرين، كل دول كلماتي وألحاني تخيلوا بقى قد إيه الصحفي ده والمطرب اللي زقه عليا فادوني في مستقبلي قد إيه كلمه جارحه المقصود منها تحطيمي بكرم ربنا أقدر أحوّلها لأحد الأسباب اللي تخليني أنجح وأكمل ٢٠ سنه من كلامي وألحاني بكتب البوست ده عشان عارف إن كتير مننا بيسمع كلام مُحبط كل يوم فا بلفت نظره إنه عنده فرصه كل يوم إنه يسمع كلمه تضايقه عشان يحولها لطاقة نجاح عظيمه تفرق في مستقبله وحياته».
