ارجع لرشدك يا حاج.. القصة الكاملة وراء إعلان بيع مطعم صبحي كابر
أحدث إعلان مطعم صبحي كابر، عن انتقال ملكيته لمالك جديد، ضجة كبيرة على مواقع التواصل الاجتماعي، حيث ذكر بيان من صفحة المطعم، أن المطعم لم يعد تحت إدارة الحاج صبحي كابر لأسباب قهرية، وأن المزيد من التفاصيل سيُعلن عنها قريبًا.
و تسبب البيان في انتشار الشائعات حول ما إذا كانت الصفحة قد تعرضت للاختراق، لكن المسئولين عن الصفحة أكدوا لاحقًا أن الصفحة سليمة وتحت إدارة الشيف صبحي كابر نفسه، وأعلنوا عن فيديو توضيحي سيصدر لبيان الحقائق.
وهنا جاء السؤال الأكثر تداولًا بين رواد مواصل التواصل الاجتماعي “ما الظروف القهرية التي دفعت صبحي كابر لبيعه بهذا الشكل الغامض والتخلي عنه رغم شهرته ونجاحه الكبير؟".
القصة الكاملة لبيع مطعم صبحي كابر
في مقطع فيديو، شرح صبحي كابر الملابسات التي دفعته إلى بيع المطعم، حيث كشف أنه كان يمتلك مزرعة لتربية المواشي ويعتمد على الذرة كعلف أساسي.
وفي وقت مبكر من الحرب الروسية الأوكرانية، نصحه أحد الأشخاص باستثمار أمواله في استيراد كمية كبيرة من الذرة، حيث أشار إلى أن سعرها سيرتفع، مما سيوفر فرصة لتحقيق أرباح كبيرة.
أسباب قهرية لبيع مطعم صبحي كابر
وتابع “أنا كل هدفي بحب أشتغل ومش عايز عيالي يحسوا بأي حاجة أنا شوفتها،عايزهم يرتاحوا، علشان كدة كنت بشتري ذرة لتسمين المواشي في مزرعتي، ممكن أجيب 200 إلى 500 طن ذرة، للمزرعة فيها 4 أو 5 آلاف عجل من المواشي”.
واستطرد "في الوقت ده شخص بلغني أن سعر الذرة 4 جنيهات، وسيزيد بعد وقت وكانت الحرب الروسية الأوكرانية في بدايتها، وقال لي نستورد مركب ذرة نتاجر فيه الكيلو سيصل إلى 6 جنيهات، في كام مليون طن سيكون الربح كبير".
وأوضح أنه "وقع في فخ عملية نصب كبيرة بسبب الطمع، وقرر يستثمر كل اللي جمعه، حتى بعت ذهب مراته وجمع فلوس بالاقتراض، عشان يستورد مركب ذرة".
وتابع “سلمت الشخص الفلوس وأنا مطمن، ومنتظر الذرة يوصل، لكن تفاجأت بأن الشخص ده ما رجعش، واكتشف بعدين إنه نصاب ونصب على نصف المصريين وهرب برة البلد، وحاولت أدور عليه واتواصل مع أهله، لكن كانوا بيتهربوا مني وما قدرتش أوصل لهم”.
حقيقة دين صبحي كابر بمبلغ 125 مليون جنيه
ومن جانبه قال هشام الإمام، المالك الجديد لمطعم صبحي كابر، إنه شريك الحاج صبحي من زمان والمطعم باعه ليا، شهر 10 السنة اللي فاتت.
وقال: إن "الحاج صبحي عرض عليَ شراء المطعم، وقال لي عندي عيال وعاوز أربيها واقعد معاهم واشوفهم بيكبروا قدامي".
وتابع “قال لي لو انت مخدش المطعم هبيعه لناس تانية وانا تعبت وانت اكتر واحد تحافظ عليه، وبعد 3 شهور مفاوضات، عملنا عقد بالعلامة التجارية والاسم التجاري وسجلنا العقد في الشهر العقاري”.
وأضاف الإمام “من شهر 12 شغالين وبيورد لنا اللحمة ولا يوجد خلاف، وحصل خلاف بينه وبين واحدة قريبته وكان كل شوية يمشيها من المطعم بسبب مشاكلها والعمال مش عاوزين نشتغل بسببها وكان بيتصل بيها عشان تمشي من المطعم”.
وتابع المالك الجديد: “لحد الخميس اللي فات كان بيورد لنا اللحمة وبعدها وقف الخط الساخط لتوريد اللحمة للمطعم، وكان علينا ضغط من الطلبات وعندي 850 عامل وهيوقف أكل عيشهم وعندنا ولاد ومدارس، ومرضيش يديني الخط الساخن ولا صفحة الفيس بوك هو الحاج صبحي بيعمل ليه كدا معايا هو أكبر من كدا واللي بينه وبيني عشرة مش فلوس، ولو انت حصل لك مشكلة ايه ذنبي وانا اديتك فلوس المطعم وانا ممشتش حد من المطعم، عندي ناس بقالها 35 سنة شغالين في المطعم، لو حصل لك ازمة انا مالي او العمال اللي شغالين في المطعم، ولو عاوز المطعم خده يا حاج صبحي وانا مش هدفعك شرط جزائي".
وتابع: “عمانا ارقام للخط الساخن بديلة علشان هو قطع الخط الساخن عنا لو حد عاوز يطلب حاجة بنفس الاسعار والجودة،والكام يوم الي قطع عنا اللحمة رحت جبت من التجار اللي كان بيجيب اللحمة منه، وانا ممشتش حد من المطعم وقريبة حماته اللي عملت مشكلة وهو كمان مشاها قبل”.
ووجه الإمام كلامه لصبحي كابر قائلًا: “يا حاج صبحي انت كدا هتتسبب في ضرر لـ 850 عامل هيقعدوا في البيت ورجع لنا الخط الساخن، ارجع لرشدك يا حاج صبحي ورجع الخط الساخن والصفحة علشان الـ850 عامل وربنا مش هينسانا ولا هينساهم”.
توريد اللحوم للمطعم الجديد
وكان قد تردد خلال الساعات الماضية إنه رغم البيع، استمر كابر في توريد اللحوم للمطعم الجديد، ومع مرور الوقت، تعقدت علاقته بالمالك الجديد، مما أدى في نهاية المطاف إلى اتخاذه قرارًا بالابتعاد والعودة لافتتاح مشروعه الخاص.
مع ذلك، استمر الجدل بين رواد مواقع التواصل الاجتماعي، حيث أشار الكثيرون إلى أن هناك تفاصيل غامضة لم يُكشف عنها بعد.
ويبدو أن هناك شكوكًا حول سبب استثمار صبحي كابر في صفقة الذرة من البداية، واعتبر البعض أن هناك حلقة مفقودة في القصة، وعلقوا بأن الظروف المعلنة قد لا تكون هي القصة الكاملة وراء بيع المطعم الشهير.
