مصيبة جوزي كشفتها الشغالة.. زوجة تروي أغرب تفاصيل خلاف زوجي أمام محكمة الأسرة

مازالت حكايات الخلافات الزوجية تنهال على محكمة الأسرة، ويرويها أصحابها أمام خبراء مكاتب تسوية النزاعات الأسرية بعدما وصلت بهم الحياة إلى طريق مسدود، فما كان بهم إلى أن يلجأ كل منهم إلى محكمة الأسرة.

تفاصيل الدعوى التي نسردها في السطور التالية، روتها صاحبتها لـ محكمة الأسرة وطلبت في نهايتها الحكم بتطليقها للضرر بعدما استحالت العشرة بينها وزوجها رغم مرور 27 عامًا على زواجهما.

قالت الزوجة مقيمة الدعوى- ربة منزل- أمام خبراء التسوية بمحكمة الأسرة بالقاهرة: «لو عشت معاه يوم واحد كمان وعلى ذمته هموت، وعيالي هم اللي هيدفعوا التمن ويتبهدلوا من بعدي»، حيث رفضت الزوجة ما أبداه خبراء التسوية بمحكمة الأسرة من عرض للصلح مع زوجها (المدعى عليه)، وأصرت على إحالة دعوى الطلاق للضرر إلى المحكمة للفصل فيها.

بدأت الزوجة حديثها قائلة لخبراء التسوية بمحكمة الأسرة: «أنا هحكي الحكاية من أخرها لأنها صدمة كبيرة ومفاجأة مش قادرة لحد النهاردة أستوعبها».

وتابعت: «أنا بإختصار إكتشفت إن جوزي «نصاب على الستات العواجيز» بيتجوزهم كام شهر، وياخد منهم فلوس، وبعدين يطلقهم، وبقاله أكتر من 6 سنين على الحال ده وأنا مش دريانة بحاجة».

وأضافت الزوجة المدعية أمام محكمة الأسرة: «كنت عند واحدة قريبتي بزورها من حوالي شهرين، وكانت عندها «شغالة» بتساعدها في شغل البيت، وبعد ما خلصت قعدتنا عدي عليا جوزي ياخدني وهو مروح من شغله – محاسب في شركة إستيراد وتصدير- اللي كان قريب من بيت قريبتي. طلبت منه يطلع يسلم على قريبتي يعني من باب الذوق، فطلع ويدوب خمس دقايق ومشينا.. وبعد يومين من الزيارة، اتصلت بيا قريبتي وقالتلي «عاوزة أكلمك في حاجة بس مش عارفة أقولهالك إزاي، واترددت كتير أوي قبل ما أقولك»- هكذا قالت الزوجة مقيمة الدعوى في تفاصيل دعواها أمام محكمة الأسرة -.

وأضافت لخبراء محكمة الأسرة: «قولتلها قولي على طول إنتي كده خوفتيني، واللي قالتهولي كان فعلا كارثة، لأن البنت «الشغالة» عرفت جوزي أول ما شافته وقالت لقريبتي ده متجوز ست كبيرة في السن وساكنة في المكان الفلاني وأنا كنت عندها من فترة بنضف لها البيت وهو كان هناك».

وقالت الزوجة أمام محكمة الأسرة: «كل التفاصيل اللي بعد كده مش مهمة لأنها بتتلخص في إن جوزي فعلا إعترفلي إنه متجوز الست دي، ومش كده وبس، ده قاللي كمان إنه إتجوز 3 ستات تانيين قبلها بنفس المواصفات، وإنه عمل كده عشان الفلوس، ويحافظ لنا على مستوى معيشي كويس وما يحرمناش من حاجة». وواصلت: «ماكنش فيه حاجة تتقال بعد كده غير إني أصريت على الطلاق وقولتله مش ممكن أعيش معاك يوم واحد تاني، بس هو رفض وقال إنه متمسك بيا وخايف على ولادنا لكن أنا مالاقيتش طريق أخلص بيه من حياتي معاه غير محكمة الأسرة».