بيخوني وقالي شوفي علاقاتك.. سميرة تطلب خلع زوجها في محكمة الأسرة

سميرة سيدة أربعينية وقفت أمام محكمة الأسرة في المعصرة تشكو زوجها طالبة الخلع منه بعد عثورها على ملابس داخلية خاصة بإحدى السيدات داخل شقتها، وحينما سألت زوجها أنكر ذلك واتهمها بأنها هي من تحضر السيدات وتقيم معهم علاقات غير شرعية كونها كانت تعمل في إحدى مراكز التجميل، وحينما طلبت الانفصال رفض فقررت رفع قضية خلع عليه.

سميرة تطلب الخلع بسبب خيانة زوجها

سردت سميرة قصتها كاملة مع زوجها قائلة «قبل 15 عاما كنت أعمل في أحد مراكز التجميل بمدينة نصر وحينها كان يعمل في ذات العقار شاب في إحدى الشركات بالطابق الخامس ونشبت بيننا علاقة صداقة أثناء شراء بعض المستلزمات من السوبر ماركت وبعدها بـ عامين صرح لها بحبه وأنه يريد التقدم لأسرتها والزواج منها وبالفعل وافقت وقام بالاتصال بوالدها وطلب مقابلته».

وقالت سميرة «أسرتي وافقت على الزواج وبعدها اتخطبنا وحددنا ميعاد سنة ونص عشان نتجوز، وفعلا بعد سنة ونص اتجوزنا، ومكنش بيني وبينه أي مشاكل غير الحاجات العادية اللي في كل بيت، لكن مع مرور السنين طلب مني أسيب الشغل وده حصل فعلا وقعدت في البيت، ومرت السنين بيني وبينه، ومحصلش حاجة تعمل بينا مشاكل كبيرة، لكن بعد كل السنين دي كانت المفاجأة بالنسبة لي أنه بيخوني».

تابعت سميرة «بعد سنين جواز شوفت شات على موبايله بينه وبين واحدة وكان عليه صور وحاجات متتقالش وساعتها حصل خناقة كبيرة بيني وبينه وفضلت تقريبا 3 شهور وبعدها اتصالحنا بالعافية وفضل يصالح فيا لكن بعدها بـ سنة بس كانت الخيانة الأكبر ودي مكنش فيها حل ولا تصالح خدت العيال بعدها وروحت بيت أسرتي وقولت له يطلقني ومفيش حل غير الانفصال».

وأكملت سميرة قائلة «كنت عند أسرتي 3 أيام ولما رجعت كنت بنضف الشقة عادي والولاد كانوا مكملين عند ماما عشان الإجازة، ولقيت ملابس حريمي داخلية في البيت بالصدفة والواضح أنها مستعملة مش حتى جديدة، وسيبتها في مكانها ولما رجع من الشغل قولت له إيه ده، قالي وأنا أعرف منين هتلاقيه بتاعك ولا حاجة، قولت له لا مش بتاعي، قالي أنتي رجعتي تشتغلي تاني في تقديم خدمات التجميل للسيدات وجبتي واحدة هنا، والله أعلم كنتوا بتعملوا ايه، وقلب عليا أنا الموضوع، سيبته ومشيت من البيت وروحت لأهلي وطلبت الطلاق».

اختتمت سميرة قائلة «رفض أنه يطلقني وساعتها مكنش في إيدي غير أني أرفع عليه قضية خلع عشان أخلص من خيانته، وجيت محكمة الأسرة عشان أخلعه وطبعا هو بيحاول يخلي أخواته البنات يكلموني عشان نتصالح وأهلي بيحاولوا بس خلاص طالما وصلت لـ كدة مش هينفع».