رومانسي زيادة عن اللزوم.. سيدة تطلب خلع في محكمة الأسرة
تقدمت سيدة ثلاثينية بدعوى خلع ضد زوجها الأربعيني أمام محكمة الأسرة، موضحة في صحيفة دعواها أن زوجها شديد الرومانسية، لكن بطريقة لم تعد تحتملها، لافتة إلى أنه يستخدم الهدايا والمفاجآت الرومانسية للهروب من أي نقاش جاد أو حل الخلافات بينهما، بدلًا من الاهتمام الحقيقي بمشاعرها ومشاكلها.
سردت السيدة تفاصيل دعواها: «تزوجنا زواج تقليدي منذ سنتين، كان فارس الأحلام اللي أي بنت تتمناه، وسيم، مهتم بيا، وعمره ما خلاني أحتاج حاجة، في الخطوبة كان كل شوية يفاجئني بهدية، ورد، سهرات في أماكن فخمة، وكان بيقول إنه مستعد يعمل أي حاجة عشان يسعدني، وقتها حسيت إني محظوظة، بس مكنتش أعرف إن ده هيكون سبب انهيار زواجنا».
تابعت: «مع الوقت، لو كنت متضايقة من حاجة كبيرة، بيستخف بمشاعري ويقول لي: إنتِ أجمل لما بتكوني مبسوطة، أنا عايزة حد يسمعني، يناقشني، يحس بيا، مش يحل مشاكلي ببوكيه ورد أو شوكلاته أو حتى هدية الماظ، في مواقف تحتاج إلى قرارات جدية».
تابعت: «حتى لو حصلت مشكلة كبيرة، كنت ألاقيه يجيبلي ألماظ أو أي هدية فخمة، وكأنه بيقول لي: خلينا ننسى اللي حصل، من غير ما حتى يحاول يفهم أنا زعلانة ليه، بدأت أحس إنه مستهتر، وإن أي خلاف بينا بيتحل مؤقتًا لكن مش فعليًا والحياة مش كلها هدايا، ساعات بنحتاج حد يسمعنا ويفهمنا ويحل معانا مشاكلنا بعقل ومنطقية عشان المركب متغرقش».
