ما قصة «الملك والجلابية» التي رواها سامح حسين أمام الرئيس السيسي في حفل الإفطار؟
روى الفنان سامح حسين، أمام الرئيس عبدالفتاح السيسي، خلال حفل إفطار نظمته القوات المسلحة، مساء الإثنين، قصة «الملك والجلابية»، التي تدعو إلى عدم النظر إلى ما وصفه بـ«اشتغالات الحياة»، والتركيز على الوصول في آخر الرحلة عند ملك الملوك بقلوب بيضاء.
وقال سامح حسين: «كان في ملك هندي زمان أوي، حب يدي جائزة كبيرة لواحد من الرعية، وحطله تحدي مقابلها، واداله جلابية ناصعة البياض، وقاله خد الجلابية دي وروح بيتك، وبكرة الصبح من بدري تلبس الجلابية، وتجيلي القصر لو لقتها بيضاء، زي ما سلمتهالك أنت كدا كسبت الجائزة».
وتابع: «الراجل قال أيه، الرهان السهل دا الملك دا هندي ولا ايه، ماشي يا مولاي نجيلك بيها بيضاء ايه المشكلة يعني، وروح البيت لقى مراته هتموت، وتفتح الشنطة وتعرف ايه اللي فيها، بس هو مش عاوز حد يلمس الجلابية، فقال لها إن الشنطة دي فيها مانجا هندي، ويظهر بقا مراته كان عندها فوبيا من المانجا فمقربتش من الشنطة».
وأضاف: «تاني يوم صحي الراجل من الصبح بدري، لبس الجلابية بتاعته بحذر، عشان ايده مبتبصمش عليها وخرج من بيته، وطلع على موقف عبود بتاع الهند، وركب أول ميكروباص وقعد في آخر الكنبة عشان محدش يخبط على كتفه، بس الست اللي كانت قاعدة جنبه كانت بردانة تقريبًا فبدأت تعمل معاه نوش، عشان يقفل الشباك، ومع إنه كان حران ومخنوق بس قفلها الشباك».
وأكمل: «وهو ماشي حذِر جدًا، كان في واحد فارش فرشة كدا بيبيع عليها تمر هندي، رمى بلاه عليه وقال له أنت خبطت لي الفرشة، ودلقت التمر، فصاحبنا محبش يدخل نفسه واداله قرشين تعويض، وكمل طريقه وفضل طول الطريق يجنب نفسه حوارات وصراعات مكنش متخيل إنه ممكن يقابلها، وكان هدفه الوحيد إنه يوصل قصر الملك والجلابية لسه بيضاء».
واختتم: «الراجل كسب الرهان، بس عرف قد ايه الحكاية مكنتش سهلة، عارف ايه التحدي الأصعب من الجلابية؟، هو التحدي بتاعي أنا وأنت في الحياة، ولا إننا نقعد على أكبر عدد من كراسي السلطة، ولا إننا نحقق أكبر قدر من الإنجازات والمكاسب، كل دا مهم بس مش أهم حاجة».
وتابع: «التحدي الوحيد هو إننا نوصل في آخر الرحلة عند ملك الملوك، وقلوبنا بيضاء زي ما استلمناها، وإننا نصون العهدة اللي ربنا إئتمننا عليها، ومنبوظش فيها حاجة»، مرددًا: «إلا من اتى الله بقلب سليم».
تكريم الفنان سامح حسين
وأشاد الرئيس عبدالفتاح السيسي، ببرنامج الفنان سامح حسين «قطايف» الذي يعرض في شهر رمضان على مواقع التواصل الاجتماعي.
ومازح الرئيس السيسي، الفنان سامح حسين، خلال حفل إفطار نظمته القوات المسلحة في أحد الفنادق الكبرى بالقاهرة، بحضور عدد من قيادات الجيش، والأفرع الرئيسية، وكبار المسؤولين، ولفيف من الإعلاميين والصحفيين، قائلًا: «فين القطايف يا حسين؟»، ليرد الممثل، ومقدم البرنامج مازحا: «اتاكلت كلها يا ريس».
وسأل الرئيس السيسي الفنان سامح حسين: «صرفتوا كام على الدعاية يا حسين؟».
وأجابه الفنان قائلا: «إحنا يا سيادة الريس عملنا البرنامج لوجه الله، ومصرفناش ولا جنيه على الدعاية، لكن المصريين اتولوا الدور ده، وعملوا أحسن دعاية للبرنامج».
ومازح الرئيس السيسي الفنان سامح حسين خلال حفل الإفطار، وقال ضاحكا: «طيب طالما مصرفتوش فلوس على الدعاية، حققتوا كام (أرباح) من البرنامج»، لتضج القاعة بالضحك.
وأشاد الرئيس بمحتوى برنامج قطايف، مشددًا على أنه يقدم محتوى مميز يليق بالمصريين.
