الزعيم وسليمان عيد.. تفاصيل علاقة بدأت بـ 1500 جنيه وانتهت بصداقة

رحل عن عالمنا،  الفنان سليمان عيد، عن عمر يناهز الـ 64 عامًا، وأعلن نجله عبدالرحمن خبر الوفاة، وكتب عبر حسابه الرسمي على موقع فيسبوك: «أبويا في ذمة الله، إنا لله وإنا إليه راجعون».

وكان الفنان الراحل تجمعه علاقة قوية بالزعيم عادل إمام، إذ أنها بدأت منذ عام 1993، تحديدًا أثناء عرض مسرحية «الزعيم» إخراج شريف عرفة، وكانت العلاقة وليدت الصدفة.

علاقة سليمان عيد وعادل إمام

وقال سليمان عيد في لقاء قديم ببرنامج «سهرانين»، تقديم الفنان أمير كرارة: «كنت مخلص شهر العسل.. ونازل أقدم مسرحية أسمها لوز وجوز.. وتفاجأت إن المسرحية قفلت وأنا عليا أقساط بسبب الزواج وكنت محتاج فلوس..و كلمت صديقي الفنان فتوح أحمد وقولتله أنا عايز أشتغل أي حاجة.. قولتله هشتغل مجاميع وأجري في الحلقة 75 جنيه ولو عملت 10 مشاهد يبقى 750 جنيه دا كان مبلغ كبير وقتها سنة 93..و لما روحت اتكسفت من زمايلي دفعتي اللي كانوا معايا في المعهد ومكنتش عايز أظهر قدامهم إني بشتغل مجاميع».

وأضاف: «و أنا مروح مع صديقي الفنان محمود البزاوي قالي تعالى اتفرج معايا على مسرحية الزعيم بتاعت عادل إمام احنا بنعرضها.. ولما روحت لقيت العرض تأجل.. وروحت اتكلمت مع عادل إمام وحكيتله حكايتي.. وبعدها شغلني معاه في المسرحية ومضاني عقد إني هاخد 1500 في المسرحية.. وبعدها ابني اتولد وعملت سبوعه في المسرح وعادل إمام هو اللي اختار له اسم عبدالرحمن».