أسامة كمال: المصرى الناجح بالخارج سند لغيره..ومكسب كبير لبلده

أكد الإعلامى أسامة كمال، أن الإنسان المصرى الناجح دائمًا ما يكون سندًا لكل مصرى فى الخارج، مضيفًا :" هذا الأمر مكسب كبير لمصر، وأنا فارق معايا كل مصرى، ناجح ومسمّع وواخد حقه ع الآخر جوه مصر وبره مصر، فارق معايا إن كل واحد، وكل مؤسسة تكون حاطة رجلها ع الطريق وبتحاول تبقى نمرة واحد، نمرة واحد فى كل حاجة، لأن عشان بلد كاملة تكون قدام يبقى مواطنيها ومؤسساتها لازم تكون قدام".

وقال أسامة كمال، خلال برنامجه "مساءdmc " المذاع على شاشة "dmc"، : "يعنى عشان مصر تتقدم فى التعليم ما ينفعش جامعة واحد ولا مدرستين يبقوا كويسين لأن التعليم فى مصر هو مجموع المدارس والجامعات فلو واحدة منهم 50% وواحدة 60% وواحدة فوق وواحدة تحت هيبقى التعليم فى مصر هو محصلة دول كلهم مع بعض وتبقى الصحة محصلة مستوى مستشفياتنا".

وواصل: "عشان مصر كدولة تتقدم لازم يفرق معانا المواطن الفرد لما يحقق نجاح، ليه لازم يفرق؟ لأنه المواطن الفرد لما ينجح فى مجال بيفتح للناس بعده مجالات كتير".
وأشار إلى أن : "نجاح د. مجدى يعقوب فى جراحات القلب فى بريطانيا فتح المجال لدكاترة كتير بعده، فلما تسمع إن ملكة بريطانيا اللى حركتها بحساب نزلت تهنئ د. محمد العريان بانتخابه رئيس لكلية كوينز فى جامعة كمبريدج، فيبقى ده طبيعى، ولما نجمنا العالمى محمد صلاح يحقق اللى حققه فى إنجلترا برضه يبقى طبيعي إن أنظار الأندية البريطانية تبص على مصر بعين تانية".

وتابع: "اللاعب المصرى الكويس بيرفع رصيد لعيبة مصر، والطبيب المصرى الكويس بيرفع رصيد الأطباء والمهندس الكويس بيرفع رصيد المهندسين المصريين".