21 تصريحا لـ"أبو" في "عيشها بإنيرجي" عن أغنياته الجديدة ومستقبله الفني
حل المغني والكاتب والمحلن محمد أبو العينين "أبو" ضيفا على برنامج "عيشها بإنيرجي"، المذاع على راديو "إنيرجي"، والذي يقدمه وائل منصور وسارة المنذر وهذه أبرز التصريحات التي جاءت في اللقاء:
1- بحب أسمع الأغاني الهادية وخاصة أغاني فيروز، لكني لما بغني بحب أغني أغاني ألحانها مبهجة.
2- قعدت 6 شهور بلف العالم بأغنية "3 دقات"، بعدها والدي تعب 6 شهور تانية، ودة كان سبب اختفائي لفترة، لكن بعد كدة رجعت بأغنيتين "عيش يا قلبي" و"حبيبي يا ليل".
3- زمان المنتجين كانوا بيفضلوا الألبومات عشان الناس تشتري الشرايط، لكن في الوقت الحالي الناس بتسمع الأغاني على اليوتيوب والأبلكيشنز، عشان كدة بنزل الأغاني بتاعتي سينجل مش في ألبوم.
4- أغنية عيش يا قلبي من تلحين ميمو، مالحنتهاش بنفسي لأن اللحن عجبني جدا واستأذنت ميمو إني آخده وأغني عليه الأغنية مع بعض التعديلات.
5- عزيز الشافعي من أكتر ملحنين الجيل الحالي اللي بحبهم وقريبين مني، لأنه متنوع وألحانه بتوصل للناس بسهولة.
6- الأغاني السينجل بتاعتي هطرحها قريب في ألبوم اسمه "شربات"، على اسم الأغنية اللي هتنزل الفترة الجاية واللي بعتبرها أفضل حاجة كتبتها بنفسي.
7- اسمي الحقيقي محمد أبو العينين، أول من سماني "أبو" كان صحابي في المدرسة، وأخويا سموه "إبو".
8- هكون أب قريب وبتناقش مع زوجتي على اسم البنت، ومحتارين ما بين اسم داليدا أو كاميليا.
9- يسرا وتامر حبيب ومريم أبو عوف أقرب ناس ليا من أصدقائي في الوسط الفني.
10- احتمال اتجه للتمثيل الفترة الجاية وخدت ورش تمثيل بالفعل، جالي عروض قبل كدة لكني ماقبلتش لأني حابب أركز حاليا في الغناء أكتر.
11- اتأثرت بفريد الأطرش من فنانين الزمن الجميل، وبأم كلثوم من فنانات الزمن الجميل.
12- بحب بهاء سلطان جدا ومتأثر بيه، ومتعود أغني أغانيه.
13- حضوري فعاليات مهرجان موازين كانت تجربة ممتعة جدا، والمغرب من أجمل البلاد في العالم.
14- يسرا إنسانة ماحصلتش، اتعلمت منها إنها دايما بتستفتي قلبها ومش هاممها حاجة في الدنيا.
15- أحب جدا إني أكرر تجربة العمل مع يسرا بعد تعاوننا في 3 دقات، وأتمنى إنها تغني أغنية من ألحاني وكلماتي.
16- الغناء مش طرب، لكن الغناء حالة بتفرض نفسها على المستمعين.
17- بحب جدا طريقة تعامل أمير عيد والعسيلي مع الجماهير على السوشيال ميديا.
18- مابدأتش مسيرتي الفنية كمغني، بدأت ككاتب وملحن بعد كدة قررت أغني.
19- بحب إن الأغاني اللي بكتبها يكون فيها حدوتة، الأغنية بتكون أحلى والإنسان بيحب الحدوتة بطبيعته.
20- بحب أغنية "خطوة" جدا واتمنيت لو كانت بتاعتي، لكنها لايقة على مصطفى حجاج أكتر.
21- نفسي أعمل دويتو مع محمود العسيلي أو مصطفى حجاج أو أمير عيد.
