أتعرض لضغوط للتنازل.. أول رد من ضحية التحرش داخل الميكروباص بعد إحالة المتهم للمحاكمة | شاهد
قالت رانيا سليمان، ضحية التحرش داخل ميكروباص التجمع الخامس، إنها سعيدة بقرار النيابة العامة الصادر من نيابة القاهرة الجديدة، بإحالة المتهم إلى المحاكمة العاجلة.
وأضافت ضحية التحرش:"في يوم الواقعة كنت ذاهبة الى الامتحان وكنت متوترة عشان مكنش فيه مواصلات، وبعد مرور دقائق معدودة فوجئت بميكروباص ترجلت نحوه وركبت في الكرسي الأمامي بجوار السائق.
وأكدت ضحية التحرش، في تلك اللحظة كنت بكلم صحبتي بقولها أنا جاية في الطريق، وبعدها لم تمر سوى دقيقة واحده وفوجئت بالسائق يلمس أجزاء حساسة من جسدي، في تلك اللحظة لم أشعر بنفسي وانتابتني حالة من الخوف الشديد.
واستطردت ضحية التحرش، بعدها كلمت صحبتي علي الواتس اب وقلت لها انه في سائق بـ يتحرش بيه وانا مش عارفه اعمل ايه، صمتت صديقتي برهة من الوقت وقالتلي:"صوريه بسرعه وهو بيلمسك متسبيش حقك يضيع"، هنا قمت بتشغيل الكاميرا وصورته وهو بيلمسني وانا جالسة بجواره.
وتابعت ضحية التحرش،" كنت أشعر بحالة من الخوف الشديد والتوتر، وانا بصورة ومكنتش قادرة اتحكم في اعصابي وايدي كانت بتترعش، ولما نزلت من الميكروباص راح السائق شدني من ايدي وقالي:"انتى هتكملى معاي مش هتنزلي دلوقتي".
واستطردت الضحية، بعدها رحت شديت ايدي وقولتله انت عبيط، ولما شديد ايدي وقعت على ضهري على الرصيف وبعدها صورت العربية من الخلف لفضح أمره.
وأكدت، ضحية الميكروباص،"لو رجع بي الزمن مرة أخرى هقوم بتصوير الواقعة ومش هسيب حقي خالص، كمان كنت هحاول اخلي الفيديو يظهر فيه وجهه كاملًا بس انا كنت خايفة ومقدرتش اصور غير ايده وكنت بعدها هصوت وهخلي الناس تتلم عليه.
وأضافت ضحية الميكروباص، في شخص من أهل المتهم كلم اخويا وقالوا عايزين نتصالح وعرضوا عليه فلوس بس مش بطريقة مباشرة ورفضنا كل ذلك.
وعن دعم اسرتها، أكدت الضحية،"والدي كان دائما بيدعمني وينصحني اعمل ايه واهلي كلهم وقفوا جنبي ودعموني اني اعمل محضر.
وأنهت رانيا سليمان صحية الميكروباص حديثها قائلة:"ربنا مش بيفضح حد من اول مره هو اكيد عمل كده كذا مره، وربنا رفع عنه الستر، وطالب بتوقيع اقصى عقوبة على المتهم علشان يكون عبرة لأي حد يتحرش بالفتيات في الشارع بطريقه بشعة.
وكانت أمرت نيابة القاهرة الجديدة، بإحالة سائق ميكروباص لاتهامه بالتحرش بفتاة بالتجمع الخامس للمحاكمة الجنائية.
وكانت الأجهزة الأمنية كشفت ملابسات مقطع فيديو تم تداوله على موقع التواصل الاجتماعي "فيسبوك"، بشأن تعرض إحدى الفتيات للتحرش من قبل سائق سيارة ميكروباص.
على الفور رصدت المتابعة الأمنية تداول مقطع الفيديو، متضمنًا تعرض إحدى الفتيات للتحرش من قِبل سائق حال قيادته مركبة ميكروباص، بالفحص تبين قيام (طالبة - مقيمة بدائرة قسم شرطة ثان أكتوبر بالجيزة)، بتحرير محضر بقسم شرطة التجمع الخامس بالقاهرة لتضررها من قائد سيارة "ميكروباص"، لقيامه بالتحرش بها أثناء استقلالها السيارة معه بالكرسي المجاور له، تم تحديد مرتكب الواقعة وتبين أنه (مقيم بدائرة مركز شرطة الصف بالجيزة).
وعقب تقنين الإجراءات، تمكنت الأجهزة الأمنية بالقاهرة من ضبطه حال استقلاله المركبة المشار إليها، وبمواجهته اعترف بارتكابه الواقعة على النحو المشار إليه، وتم اتخاذ الإجراءات القانونية.
