دقيقة و25 ثانية خربت بيتي.. كيف دمر فيديو الرقص حياة مُعلمة الدقهلية؟ | شاهد

بين ليلة وضحاها، تحولت قضية معلمة الدقهلية، من جان إلى مجني عليها، ولا تزال الآراء منقسمة بين متعاطف معها ومن يرى أنها تستحق العقاب وأن رد فعل زوجها طبيعي من رجل شرقي شعر بطعنة في كرامته، عقب تداول فيديو الرقص على مختلف مواقع السوشيال ميديا، وإحتلال «التريند».

بيتي اتخرب واتطلقت

كشفت آية يوسف، ضحية انتشار فيديو الرقص الخاص برحلة معلمي الدقهلية، عن طلاقها من زوجها، عقب انتشار الفيديو، رغم عدم إقتناعها بإرتكاب جريمة، مشيرة إلى أن ما حدث مجرد قضاء وقت سعيد مع زملائها.

وأضافت معلمة الدقهلية: «أنا معملتش حاجة، وكنت في الرحلة مع معلمين ونقابة معلمين أول المنصورة وأسرهم، وكان معي أبنائي الثلاثة، لأن الرحلة كانت عائلات وكل شخص كان موجود كان معه أسرته، حتى إن زوجي كان سيحضر معنا الرحلة لكن حصل له ظرف في آخر لحظة، فذهبت أنا والأولاد فقط، لكن بعد انتشار الفيديوهات كل حاجة اتقلبت، وزوجى طلقنى وأصبحت متهمة بإيه مش عارفة».

وتابعت: «أنا معملتش حاجة.. كل اللى بعمله انى فرحت ولعبت زي أي حد كان موجود في الرحلة، لكن الناس دبحتنى وكأني ارتكبت جريمة لما ضحكت ولعبت مع زمايلي، أنا وظيفتي كمعلمة تنتهي على باب المدرسة، أنا مثل كل الناس، من حقى أعيش حياتى، وأفرح وألعب وأرقص، حتى المحامي بيقلع روب المحاماة خارج قاعة المحكمة وبيعيش حياته عادى، والا المفروض إني أمشي طول الوقت ماسكة كراسة وقلم وأقول أنا معلمة، والمعلمة مش من حقها تفرح ولا تضحك ولا ترقص مع أخواتها وزمايلها».

مش بخبي حاجة عن جوزي ومغلطتش

وتابعت: «أنا مغلطتش غير في حاجة واحدة، بس إنى خرجت وفرحت في رحلة كان فيها ناس عديمة الشرف والأمانة وهي اللي نشرت الفيديو علشان تشهر بي وبأسرتي وبأولادي الثلاثة وكل الناس كانت بترقص هل معنى كده إني أنشر لهم الفيديوهات دي أكيد مش هيحصل لأني أحترم نفسي وزمايلي».

واستطردت قائلة «نفسي الناس تنسى الموضوع ده علشان أقدر أرجع أعيش حياتي بشكل طبيعي، أنا انسانة عادية واتصرفت بحريتي، لكن بسبب التصرف العادي ده اتحولت حياتي لجحيم، وانقلبت الأمور رأسا على عقب بعدما طلقني زوجي بسبب ناس معدومة الضمير، وأصبحت أنا وأولادى نعانى من حالة نفسية سيئة، رغم اننا لما روحنا الرحلة كان اليوم جميل، ورجعت حكيت لزوجي على كل حاجة فيه، لأنى مش متعودة انى أخبى عليه حاجة».

مش هاسيب حقي

وأضافت: «أنا هاتخذ الإجراءات القانونية، ومش هاسيب حقى، لأن اللى حصل كثير ومش طبيعي، ونفسى أسأل الناس اللى ذبحتنى دى: مفيش حد قريب منك بيرقص في الرحلات ومع أصحابهم وفى الأفراح، والا ده حلال عندكم وحرام عليا أنا، حسبي الله ونعم الوكيل في كل واحد جرح فيا وأساء لسمعتي».

وناشدت المعلمة الجميع بتركها وشأنها، بعدما خسرت حياتها الزوجية ووظيفتها بسبب الفيديو، مؤكدة أنها خسرت كل شيء جميل بسبب تصرف غير أمين صدر عن شخص كان معهم في الرحلة، مشددة على أنها لن تسامحه على الإطلاق، لما سببه لها من أذى وضرر سيلاحقانها حتى نهاية العمر.

وكان على عبدالرؤوف، وكيل وزارة التربية والتعليم في الدقهلية، قد أحال 5 معلمين بإدارة غرب المنصورة التعليمية للنيابة الإدارية، بعد التحقيق معهم بالشؤون القانونية بالمديرية، لقيامهم بالمشاركة في وصلة رقص على مركب نيلية أثناء مشاركتهم في رحلة نظمتها نقابة المعلمين بغرب المنصورة.