صلاح مستني دوره في البرميل.. تامر أمين يسخر من صورة استشفاء لاعبي المنتخب
علق الإعلامي تامر أمين على الصورة المتداولة لعدد من لاعبي منتخب مصر وهم يجرون عمليات الاستشفاء في برميل بلاستيكي على سطح فندق الإقامة بالكاميرون.
وقال أمين خلال برنامج «أخر النهار»: «في صورة اتنشرت امبارح لما شفتها شفت قد اية لاعبينا رجالة وأبطال ولما محمد شوقي أو ضياء السيد أو كيروش بيتكلموا عن أنهم بيواجهوا صعوبات وأهوال كنت بقول الصعاب أية يعني الجو الأوتيل شوية لحد ما شفت الصورة دي».
وأضاف: «لما شفت الصورة دي عرفت لاعبينا بيقاسوا قد اية، اللجنة المنظمة الكاميرونية جايبة لنجوم العالم براميل طرشي عشان يعملوا استشفاء لاعبيتنا بيطلعوا على سطح الأوتيل ويحطوا رجليهم في البراميل وفيها ماية ساقعة».
وتابع: «قدامنا صلاح مستني دوره على البرميل والسولية حاجز مدتين وصلاح مستني دوره معرفش هو نمرة كام في البرميل؛ لما يورجن كلوب يشوف الصورة دي يقول ايه لما الشعب الليفربولي يشوف الصورة دي يقول ايه!».
واختتم: «ومحدش يقولي إمكانيات ودي اية علاقتها بالامكانيات؛ مش عارف أجيب جهاز أو حوض سباحة صغير على سطح الأوتيل أنما مش لاعبين ونجوم العالم وتمنهم بالمليارات يبقوا بيعملوا استشفاء في برميل بلاستك فيه ماية ساقعة وبعدين بيقولوا في الآخر هو ليه الاتحاد الدولي مبيدوش أفريقيا تنظيم كأس العالم أو الأولمبياد».
