هل كتبت قضية التحرش نهاية قصتهما؟..مفاجآت جديدة في انفصال أحمد حسن وزينب | فيديو

أعلن اليوتيوبر أحمد حسن الأربعاء انفصاله عن زوجته زينب بعد زواج دام 4 سنوات أثمر عن إنجاب طفلين، مؤكدًا أنه يُكن لها كل الاحترام، وذلك بعد أن وجهت له مؤخرًا تهمة التحرش.

وقال حسن عبر صفحته على موقع فيس بوك: «قدر الله وما شاء فعل بعد 4 سنين زواج كانوا أسعد 4 سنين في حياتنا وربنا رزقنا ب طفلين زي القمر قررنا الانفصال بشكل رسمي وبهدوء وبدون أي خلافات وسنبقي أصدقاء دائما وابدا وستظل زينب أم ولادي وصديقتي التي أكن اليها كل الاحترام وأدعوا الله أن يوفقها فيما هو قادم من حياتها”.

بعد إعلان الانفصال ظهر الثنائي في مقطع فيديو عبر صفحتهما بـ«فيسبوك»، ليقول: «إزيكم يا جماعة.. الانفصال حقيقي، مش عاملين الفيديو عشان نجذب الناس، لا خالص الموضوع حقيقي وبنتكلم جد أنا وزينب بقالنا 4 سنين متجوزين، وربنا رزقنا ببنتين بس احنا قررنا ننفصل والأسباب قلنا نخليها لنفسنا شوية، وكان لازم نطلع نتكلم ونشارككم ده لأن إحنا من قبل ما نتجوز بنشارككم».

وتابع: «مش معنى إننا بنسيب إننا نشتم بعض على السوشيال ميديا ونقضيها محاكم.. يمكن آخر مرة تشوفونا مع بعض أو في فيديو مع بعض، بحترمها وهفضل أحترمها وهقدرها وبيننا أطفال وعشرة عمر، بالنسبة للقناة والشغل أنا وزينب بدأنا كل حاجة من الصفر مع بعض، وبقت من أشهر القنوات اللي موجودة في الوطن العربي، وفي نفس الوقت هنقدم عليها فيديوهات، والقناة معانا إحنا الاثنين، هي هتعمل فيديوهات مع نفسها وأهلها وأنا كمان وننزلها”.

واستكمل: «ليه قررنا إننا نقولكم عن انفصالنا لأن إنتم كنتو معانا، ومش منطقي ولا ذنبكم إننا نعمل كدة، القناة بنفس الاسم وزي ما هي، ماكناش نتمنى نطلع ونتكلم معاكم عن الانفصال ولا إننا ننفصل، لكن هو قرارنا إحنا الاثنين، ولا معناه إنها وحشة أو أنا وحش.. القصة خلصت».

وقاطعته زينب قائلة: «إحنا منفصلين بكل الحب والاحترام وكنا أصحاب من الأول، ولا هو هيشتمني ولا أنا هشتمه وكل الاحترام بينا، وبينا عشرة وقضينا 4 سنين مع بعض، لأننا أصحاب وبينا حاجات كتير وأولاد وعايزين ولادنا يشوفوا إن كل اللي بيننا تعامل محترم مع بعض مفيش زعل بيننا، سايبين بعض بكل تفاهم.. أوقات البني آدم بيستحمل لكن يكون طبعه كدة، فأنا مش هقدر أغير من طبعي، وهو ميقدرش يغير من طبعي وحبينا ننهيها بكل احترام وحُب”.

ما القصة؟

القصة بدأت حين خرجت فتاة تدعى سما «19 سنة» في فيديو عبر مواقع التواصل الاجتماعي، لتتهم أحمد حسن بالتحرش بها أثناء محادثة بينهما على تطبيق واتساب ومطالبته إياها بإرسال صور شخصية غير لائقة، بالإضافة لمحاولة استدراجها إلى منزله لإقامة علاقة غير شرعيّة.

تعود تفاصيل المحادثة لإعلان اليوتيوبر الشهير بحثه عن ممثلة شابة يتراوح عمرها بين 20 و25 عامًا للمشاركة في فيلم قصير، فتواصلت معه سما، للاستفسار عن إمكانية مشاركتها بما أنها تبلغ من العمر 19 عامًا فقط.

وكشفت الفتاة عن تفاصيل تعرضها للتحرش قائلة: «هو رد وقولتله أنا 19 سنة ينفع؟ قالي مش مشكلة تمام وابعتي صورك بعتله صوري بدل ما يقولي هتقابليني في مكان عام، قالي انتي جسمك حلو ويعتبر اتحرش بيا لفظيا، فأنا لما لقيت الكلمة دي قلت لا أنا هجرجره في الكلام تاني، وكل حاجة تبقى واضحة، بعتلي رقمه واتساب وكلمته وبدأت المحادثة من هنا وبعد كدة كلمته”.

وأضاف: «وبعدين قاللي تعالي أقابلك، ولما سألته هنتقابل بكرة في مكان عام؟ قال لا النهاردة ومش هينفع في مكان عام، وقاللي عنوان فيلته وقالي هتكون فاضية النهاردة، ومستعد أبعتلك أوبر ياخدك ويرجعك، وأنا رفضت”.

رواد مواقع التواصل الاجتماعي أعادوا مشاركة الفيديو على نطاق واسع، مؤكدين غضبهم من أحمد حسن.

رد أحمد حسن

من جانبه خرج أحمد حسن وزينب في فيديو مشترك لينفي صحة هذه الواقعة، مؤكدًا أن المحادثات التي نشرتها الفتاة مفبركة، وأنه لم يتحرش بها نهائيًا، حيث كان منشغلًا بصحبة زوجته في التحضير للاحتفال بعيد ميلاد ابنتهما أيلن، وبرر الاتهامات الموجهة له بمساعي الفتاة للشهرة.

تدخل قانوني

لم يتوقف الأمر عند حد تبادل الاتهامات عبر مواقع التواصل الاجتماعي فحسب، بل لجأت الفتاة للقانون لتأخذ الأمور مجراها، واستمعت النيابة لأقوال الطرفين، وأكد ضابط التحريات أنه بإجراء التحريات الفنية باستخدام البرامج والتقنيات الحديثة تبين أن مستخدم الهاتف المحمول المستخدم في الواقعة هو رقم المدعو أحمد حسن حسين حسن، بمحل إقامته مركز شرطة البساتين.

وقضت المحكمة الاقتصادية، الأحد، بتغريم اليوتيوبر أحمد حسن 20 ألف جنيه بتهمة التحرش بأنثى عبر الإنترنت، وتحريضها على الفسق.