ببقى في نص هدومي.. زوجة بمحكمة الأسرة: لاقيته مع واحدة جوه النادي
«جوزي رجل عجوز وعينه زايغة بس هو مش بيسيب واحدة في حالها خالص غير لما يتفرج عليها ولا بيعملي أي اعتبار لما بكون معاه».. تلك كلمات الزوجة "م" وهى تروي قصتها مع زوجها أمام محكمة الأسرة بمصر الجديدة.
فتقول الزوجة التى تبلغ من العمر 87 سنة:" اتجوزنا من أكثر من 60 سنة وجوزي دلوقتى على المعاش وعمره أكثر من 90 سنة، وعندنا 3 أولاد ولدينا أحفاد برضه، وعايشين مع بعض كل السنين دي على الحلوة والمرة".
وتابعت السيدة:"جوزي من ساعة ما اتجوزت عيبه إنه مستحيل يشوف واحده ميتفرجش عليها حتى لو كانت مش حلوة، وانا ببقي في نص هدومي قدام الناس، في مرة كنا خارجين وفي النادي لقيته واقف مع واحدة من أعضاء النادي".
وتستكمل الزوجة: " أنا لما بكون جوزي بكون طول الوقت مركزه معاه ومن تصرفاته حتى لا يهرب مني ويسيبني، وأنا مستحيل أسيبه لواحده غيري ده عشرة عمر، واحنا مع بعض من وقت ما كنت بعمل شعري بضفيرة وأبيض شعري وأنا معاه وجالي الأمراض وهو سندي، فإزاي واحدة تانية تيجي تاخده مني بعد العمر ده كله".
وتابعت:"كل أحلامي من وقت ما اتجوزت أن يكون عندي أولاد منه وأقضي كل حياتي معاه وعارفه أن جوزي شقي قبل ما نتجوز فهو حب الطفولة والشباب والكهولة، ولكنه دائما ما يغضبني بس سرعته في لفت انتباه الجنس اللطيف له".
وتقول: "أنا كل أمنياتي مع جوزي يعملي حساب ويهتم بيا ويحترم سنه وإنه جد عجوز ويجب أن يكون قدوة واحنا في النادي وأمام أحفاده، يفعل تلك الأفعال بس هو جذاب ويلفت نظر الفتيات بسبب ضحكته وغمزته اللى بتجذب انتباه أي حد".
وتختتم قائلة: "أنا قررت إنى أريح أعصابي وقلقي واسيبه يعيش لوحده ويخليه بطريقته دي، ودايما بيجرحنى ومستحيل يتوب عن كده ورفعت دعوى خلع عليه ومقولتلوش علشان لو كلمني هتراجع عن رفع الدعوى وهتأثر بيه وحتى الأولاد مقولتش ليهم عن الدعوى أي حاجة علشان اخلص من القلق ده".
