سيدة في دعوى طلاق أمام محكمة الأسرة: عايشة مع حد طاقته خلصت وأنا لسه عندي طاقة
تقدمت سيدة بدعوى طلاق للضرر أمام محكمة الأسرة، رغم أن زواجها لم يمر عليه سوى 4 أشهر، إذ كانت في الـ21 من عمرها، بينما زوجها تخطى الـ33.
«كان أشبه بزواج بلا حياة»، بتلك الكلمات وصفت السيدة زواجها، وأضافت في صحيفة دعواها: «فارق السن لم يكن مجرد أرقام في الأوراق، بل كان فجوة واسعة بين عالمين، بين فتاة ما زالت تبحث عن الحب والمشاركة، ورجل يبدو أنه تجاوز كل ذلك منذ زمن».
سردت السيدة تفاصيل دعواها امام محكمة الآسرة قائلة: «اتجوزته عن اقتناع، قلت مش مشكلة إنه أكبر مني بـ12 سنة، المهم يكون فيه تفاهم، بس اللي حصل إني كنت حاسة طول الوقت إني متجوزة حد عايش في عالم تاني غير اللي أنا فيه، كل ما أطلب منه نخرج شوية، نروح سينما، نتمشى حتى، كان دايمًا عنده نفس الرد:»مش قادر، أنا تعبان، الدنيا دوامة وأنا مش ناقص دوشة«، بقيت بحس إني عايشة مع حد طاقته خلصت، وأنا لسه عندي طاقة للحياة».
تابعت: «كنت فاكرة إن الكلام الحلو حاجة عادية بين أي اتنين متجوزين، بس لما كنت بطلب منه يقول لي كلمة حلوة، كان يردّ وهو بيبتسم نص ابتسامة:»أنا كبرت على الكلام دا«، وأنا صغيرة، نفسي أعيش وأحس إن حد مهتم بيا، إن حد بيحبني وبيفرح بيا، كنت بحاول أقنع نفسي إن الموضوع بسيط، بس بعد فترة اكتشفت إني مطفية، إني بختفي جوه حياة مش بتاعتي».
أنهت: «مش هقدر أكمّل كدا، مش عايزة أكبر وأكتشف إني ضيعت عمري في علاقة باردة، أنا مش ندمانة على الجواز، بس ندمانة إني صدقت إن الجواز ممكن ينجح من غير روح».
